Qinersineq Qinersinermi periuseq nutaaq

Ilinniartut Kalaallit Nunaannut uterunik qinersinissamut ingerlaannartumik peqataasinnaalernissaat, Namminersorlutik Oqartussat nalunaarutigeqqammerpaat.
Valg i Maniitsoq
Maniitsumi qinersivik Assi © : Qeqqata Kommunia
Allattoq Mads Lynge
marsip 11-at 2018 19:49

Innuttaasut ilinniartuunermi kingorna ukiut marluk qaangiutinnginneranni Kalaallit Nunaani utertut, Kalaallit Nunaanni ulloq siulleq aalajangersimasumik najugaqaleqqiffimminni inatsisartunut qinersinissamut kiisalu qinigassatut sassarnissamut pisinnaatitaaffeqalertut.

Kalaallit Nunaanni qinersisinnaatitaallunilu sassarsinnaassagaanni sivikinnerpaamik qaammatini arfinilinni Nunatsinni najugaqarsimanissaq piumasaqaataavoq. Ilinniartut inatsimmi ilaatinneqanngillat, ilaatinneqannginneralli ilinniarnerup naammassinerani atorunnaartarpoq. Ilinniartut siorna decembarimi naammassisut nunatsinnullu utertut apriilimi qinersisoqarnissaanut taava peqataasinnaajunnaaraluarput.

Inatsisartunummi qinersisoqarnissaanut ingerlaannartumik peqataasinnaalernissaat maanna periarfissaalerpoq:

- Kalaallit nunani allani ilinniartut, nunani allani katsorsartikkiartortut, Folketingimi sulisut, Kalaallit Nunaataluunniit nunani allani sinniisoqarfiini sulisut matumani pineqarput, Klaus Georg Hansen, Nunamut namminermut immikkoortortaqarfimmi immikkoortortami pisortaq, taama oqarpoq

- Kalaallit nunani allani ilinniartut, nunani allani katsorsartikkiartortut, Folketingimi sulisut, Kalaallit Nunaataluunniit nunani allani sinniisoqarfiini sulisut matumani pineqarput, Klaus Georg Hansen, Nunamut namminermut immikkoortortaqarfimmi immikkoortortami pisortaq, taama oqarpoq.

 

Ilinniartullu periarfissaq nutaaq nuannaraat

Ilinniartullu nunatsinnut uterunik qinersinissamut ingerlaannartumik peqataasalersinnaanissaat, Siumup Inuusuttunut Suleqatigiiffiata, SIS-ip, nuannaarutigaa.

Sapinngisamimmi amerlasuut ilinniarsimasuunissaasa ujartorneqarneranut naapertuuttoq, SIS-ip oqaatigaa:

- SIS-iminngaanniit nuannaarutigivarput. Inuiaqatigiinni oqariartuutigineqartuarami ilinniassasugut, tamannalu aamma kaammattuutigineqarluni. Taava uuma allannguutip isuamqarpugut naqissuseraa oqariartuutigineqartoq ilumoorunneqartoq. Taamaammat nuannaarutigisupilussuuarput, Siumup Inuusuttunut Suleqatigiiffiani, SIS-imi, siulittaasup tulliata aappaa Suinni Fleischer Johansen, taama oqarpoq.

Taanna Sverigemi Lundip Universitetiani sociologimik ilinnigaqarpoq, ilinniartullu ilinniareernermi kingorna nunatsinnut uterunik qinersinermut ingerlaannartumik ilaatigut peqataasinnaannginnerannut eqqorneqarsimassagaluarluni.
Inatsisartunulli qinersinissami Siumut sinnerlugu maanna taanna qinigassanngortippoq, qinigassanngortissinnaaninilu nuannaarutigaa:

- Uannut isumaqartupilussuuvoq. Tikilluaqqusaasutut misigisimavunga, tunniussinissannullu periarfissinneqarlunga misigisimavunga, Siumup Inuusuttunut Suleqatigiiffiani, SIS-imi, siulittaasup tulliata aappaa Suinni Fleischer Johansen, taama oqarpoq.