Issiavimmik kaassuartakkamik atuisoq umiarsuarmiit niusitaasoq: Pisortap kukkussutertik nassuerutigaat

Saramina Lundblad Martinsennip ernuttami kuisinnerani peqataareerluni Sisimiuniit aggustip 19-aniani umiarsuarmut ilaalluni Ilulissanut ingerlasussaagaluarpoq.

Issiavimmillu kaassuartakkamik atugaqarnera ingiaqateqannginneralu peqqutaallutik niusinneqarpoq.

-Umiarsuarmut ikingama arnat sulisut marluk tunuanniippoq angut sulisoq, taassuma oqarfigaanga issiavimmik kaassuartakkamik atugaqarama ingiaqateqarnangalu niusariaqartunga, Saramina Lundblad Martinsen oqaluttuarpoq.

Saramina isumaqarsimagaluarpoq Ilulissaniit Sisimiunut ajornaquteqanngitsumik angalagami Ilulissanut utileruni taamak ajornanngitsingisumik angalaqqissinnaassalluni.

Taamaattoqanngilarli.

Iisartakkat inuunermi pingaarutillit

Saramina 2019-imi nutaamik tartulerneqarpoq inuunermilu sinnerani iisartagartortariaqarluni oqaluttuaraa.

Saramina Lundblad Martinsen inuunerminut pingaaruteqarluinnartut iisartakkat naammattusaarlugit Sisimiunut angalasimavoq. Assi © : Ole Petersen/KNR

-Nutaanik tartulerneqarnikuunera pillugu immikkut iisartagaqarpunga, tamakkununnga allaat neqitsiukkaluarpakka kisianni oqarfigineqarpunga ingiaqateqanngikkuma angalasinnaanngitsunga.

Saramina Lundblad Martinsen oqaluttuarpoq.

Umiarsuup Sisimiuniit aallarnissaanut minutsit 15-nit iluanni ingiaqatissaminik nassaarsinnaasimanngilaq. Aningaasallu kuisittuliarnissaminut naammattusaarsimagamigit 2.500 koruuninik akiliisinnaasimanani.

-Uangaalluni annernarpoq. Saramina siullermeerluni oqaloqatigineqarnermini KNR-imut taama oqarpoq.

Kukkussutertik nassuerutigaat

Saraminap oqaloqatigereernerani Arctic Umiaq Linep pisortaa Jens-Jakob Sandgreen pisoq pillugu KNR-imiit attaveqarfigaarput. Pisumullu paasisimasaqarani oqaatigaa.

Saramina Lundblad Martinsen Arctic Umiaq Linemiit tamatuma kinguninngua utoqqatserfigineqarpoq, Ilulissanullu innarluutilinnut naleqquttumik ineqarluni arfinginngorpat angerlarnissaanut Arctic Umiaq linemiit akiliunneqarluni.

Jens-Jakob Sandgreenillu nassuerutigaa tamanna Arctic Umiaq Linep kukkussutigigaa.

Arctic Umiaq Linep angallataanut ilaassagaanni issiavimmillu kaassuartakkamik atuisuulluni sillimaniarneq pissutigalugu angalaqateqarnissaq piumasaqaataasoq Jens-Jakob Sandgreen nassuiaavoq.

Sisimiuniillu Ilulissanut aqqutaani silap allanngorartussaanera sillimaniarnerlu peqqutaalluni Saraminap angalanissaa pisinnaasimanngitsoq Jens-Jakob Sandgreen umiarsuami sulisut oqaloqatigereerneranni nassuiaavoq.

Attaveqaqatigiinnermi allannguutaasut

Issiavimmik kaassuartakkamik atuisuuguit Arctic Umiaq Linellu angallataanik umiarsuarmut ilaallutit angalarusullutit, nammineerlutit e-mail aqqutigalugu suut pisariaqartinnerlugit saaffiginnissutigissavat.

-Piumasaqaaterput annertugineqarsinnaavoq, aap, Jens-Jakob Sandgreen nassuerpoq.

-Internet atorlugu inniminneeriaaseq ajornannginnerulersissavarput, ilaasussat taamaalillutik qamutinik kaassuartakkanik atuisuunermik immersuiffissami nalunaaqutsiisinnaalissapput. Soorluttaaq ilaasussaq soraarninngornerunersoq imaluunniit meeraanersoq immersuinermi nalunaarutaasinnaasoq, Jens-Jakob Sandgreen oqarpoq.

Saramina Lundblad Martinsen Ilulissanut angerlarnissaminut tartuminullu iisartakkat iluameertut atulernissaanut erinisoqaaq. Assi © : Ole Petersen/KNR

Neriorsuutigisinnaaviuk allannguuteqartoqalersoq?

-Inniminneeriaatsimik suliaq pimoorunnerulissagipput neriorsuutigissavara. Sinersortaatip aappaagu angallasseqqilernissaanik piareersaanitsinni inniminneeriaaseq nutarsareersimarusupparput. Pisariaqartitat tamaasa suliarinerani isummersorfigisarumaarpavut, Jens-Jakob Sandgreen oqarpoq.

KNR-ip aappassaaneerluni Saramina Lundblad Martinsen attaveqarfigaa oqilisimaarporlu.

-Tartunnut iisartakkakka iluameertut atulernissaat erinigeqaara. Taakkumi atunngikkukkit inuunera naluara qanoq issagaluarnersoq. Saramina Lundblad Martinsen oqarpoq.