Innarluutillit illersuisuat isumaginnittoqarfinnut: Ilaqutariippassuit nukillaartarput
- Innarluutillit inatsisitigut isumannaatsuunerisa kommunit isumaginnittoqarfiini sullissinermi aarlerinartorsiortitaasarnerat tamaat isigalugu ajornartorsiutaaqaaq.
Qeqqata Kommuniata meeqqanik tapersersuisarneq pillugu inatsimmik unioqqutitsisimasoq qaammatip siuliani ersereersorlu, innarluutillit illersuisoqarfiat, Tilioq, tusagassiuutinut taama nalunaarpoq. Tassa meeqqat ilaata pisariaqartitaminik ikiorserneqarsimanngilaq.
AAMMA ATUARUK Ombudsmandi: Qeqqata Kommunia ilungersunaqisunik qasseeriarluni kukkusarsimavoq
Qeqqata Kommuniata meeqqamut ikorfartuinermut suliaa isumaginninnermi suliani ilungersunarluinnartunut ilaasoq kisiartaaqqajanngitsorli, innarluutillit illersuisuat Anna Hynne Nielsen isumaqarpoq. Inuit allaffissornikkut aaqqissuussaanermi ilaginnarneqarsimasorpassuaqarnerat Tiliumi tusartuaritik, taanna oqarpoq.
Ilaqutariippassuit nukillaartut
Meeraq taanna atugarliortoq Qeqqata Kommunianut arfineq-pingasoriarluni nalunaarutigineqarsimavoq, taakkualu 2017-imi novembarip arfineq-pingajuata 2020-milu maajip 14-iata akornanni pisimapput.
Meeraq taanna qulinguaannarnik ukioqartoq suliaq aallartissimavoq.
Assersuutigalugu meeraq taanna eqqarsartaatsikkut ineriartornermigut kinguariaateqarsimasoq, tarnip pissusiinik ilisimasallip nalunaarutigisimavaa. Aamma imminornissamik eqqarsaateqartartoq imminullu innarlertartoq, nakorsaanerit ilaata kommunimut aamma nalunaarutigisimavaa.
Tassa isumaginninnikkut misissuinissamut tunngavissaqarnersoq, kommunip siullermilli nalunaaruteqartoqareernerani nalilersimasariaqaraluarpaa.
Meeqqanimmi tapersersuisarneq pillugu inatsit naapertorlugu kommuni nalunaarfigineqarnerminiit nalunaaquttap akunneri 24-t qaangiutsinnagit isumaginninnikkut misissuinissamut tunngavissaqarnersoq isummertussaavoq.
Kommunili taamaaliorsimanngilaq, taamaammat inatsisinik meeqqat inuusuttullu tapersersorneqarnissamik neqeroorfigineqarnissaannik qulakkeerutaasussanik unioqqutitsilluinnarsimavoq.
- Innarluutilinnik isumaginnittoqarfiit ataatsimut isigigaanni ingerlanerlioqaat. Inuit Ilaginnakkat amerlapput, aamma kukkunerpassuaqarpoq suliallu unitttoorutaakkajullutik, innarluutillit illersuisuat Anja Hynne Nielsen oqarpoq.
Ataatsimut isigigalugu Tiliup naammaginartinngisaanik pisoqartaleriartoqisoq, taanna oqarpoq. Assersuutigalugu Tilioq inunnit sullissisunit illua tungilerneqartutut misigisimasunit maallavigineqartarpoq.
- Sullissisut ilaanni illua tungiliisarput, saaffiginnittut ikiorneqaratik allaat ajornartorsiuteqaliinnartarlutik, taanna oqarpoq.
Sulianik suliarinnissinnaasunik aalaakkaasunik, sulissinermik ilisimasalinnik misilittagalinnillu ilinniarsimasunilluunniit sullissisussaalatsisoqartoq, innarluutillit illersuisuat oqarpoq. Tamannalu inunnik ilaginnaalluinnarnermik kinguneqarpoq.
- Tamanna ilaqutariippassuit nukillaarnerannik malitseqarluinnarpoq. Tassa ilaqutariit minnerusumik ajornartorsiuteqarlutik saaffiginnissutaat, kommunip suliarinngikkaangagu alliartulerneranik kinguneqartarpoq, Anja Hynne Nielsen oqaluttuarpoq.
Eqqunngitsumik sullissisoqartarnera utoqqarnik eqquisoq
Isumaginnittoqarfiillu utoqqarnik aamma sullissiniaaluusaartarnerat utoqqaat illersuisuata Inga Egedep aamma naammagisimaanngilaa.
- Siullermik paamaarpallaarput. Aamma suliassat suliarineqartarnerat pillugu inatsit qiviaraanni eqqunngitsumik sullissikkajupput, taanna oqarpoq.
AAMMA ATUARUK Ældretalsmand: Plejehjemsbeboerne i Upernavik er i livsfare
Tamanna inuppassuit ikiorserneqarnissamik pisinnaatitaaffeqartuusut ikiorserneqanngitsoornerannik kinguneqartoq, utoqqaat illersuisuat oqarpoq. Tamannalu ilaatigut inuit sullinneqarnermik killiffianut tunngasumik allagarsisannginnerannik peqquteqarpoq.
- Kommunimmi sullitaminnut allagaqaratik oqaatsitiguinnaq anngussikkajupput. Taamaammat sullitaat ikiorserneqarnissamik pisinnaatitaaffeqartuusut sullinnerini sooq allannguisoqarneranut ikiorserneqannginnerannulluunniit tunngasunik uppernarsaateqartanngillat, utoqqaat illersuisuat oqarpoq.
Aamma nunaqarfinni illoqarfinnilu isumaginnittoqarfiit assigiinngitsunik sullisseriaaseqartut, taanna oqarpoq. Kukkunerit ilarpassui nunaqarfinni suliarpassuaqarfiusuni ataasiinnarmik ikittuinnarnilluunniit sullissisoqartuusuni pisartut, taassuma erseqqissaatigaa.
- Piumassusikippallaarlutilluunniit tulleriiaarinerlupput
Kommunit isumaginnittoqarfii sullissisinnaasunik isumaginninnermullu tunngasuni ilinniarsimasunik assigiinngitsunik sulisussaalatsisut, innarluutillit illersuisuata arajutsisimanngilaa.
Assersuutigalugu Kommune Kujalliup meeqqanik inuusuttunillu isumaginnittoqarfiani sullissisut arfineq-pingasuugaangamik ataasiinnaq isumaginninnermi siunnersortitut ilinniarsimasuusarpoq. Avannaata Kommunianilu isumaginnittoqarfimmi sullissisut arfinilliugaangamik arfineq-marluugaangamilluunniit ataasiinnaq ilinniarsimasuusarluni.
AAMMA ATUARUK Meeqqanik inuusuttunillu isumaginnittoqarfiit suliaat sulisuisa amerlassusaannut naleqqiullugit amerlavallaarujussuartut
- Sulisussaalatsinerat utoqqatsissutissaanngissorivarput, sulisussaalatsinerammi ukiorpassuanngortuni ilisimaneqarpoq, Anja Hynne Nielsen oqarpoq.
Isumaginnittoqarfiit sulisussaalatseqisarnerisa ajornartorsiutaajuartarneranut suut pissutaarpiarnersut misissoqqissaarneqartariaqartoq, taanna isumaqarpoq.
- Tamannalu oqartussaasut piumassusikippallaarnerannik tulleriiaarinerlunnerannilluunniit peqquteqarsimasinnaasoq eqqarsaatiginngitsoorsinnaanngilara.
- Taakkorpiaammi pissaaneqartuullutillu akisussaasuugamik ajornartorsiut anigorniarlugu misissueqqissaartariaqarlutillu allanngueqqusisariaqarput aaqqiissuteqaqqusisariaqarlutillu, innarluutillit illersuisuat oqarpoq.
