Utoqqaat illersuisuat: Upernavimmi utoqqaat inuunerminnik navianartorsiortitaapput
Upernavimmi utoqqaat angerlarsimaffianni najugalinni arfinillit kaassuartakkaniinnaq ingerlapput. Taakkua tamarmik qullerpaami ineeraqarput. Elevatorili ajormat taakkua ilaat ukiuni marlunni kingullerni marloriaannarluni anivoq. Aniniarnerminili inunnit sisamanit tummeqqakkut akiarneqarluni aqqunneqartarpoq, aneereeraangallu akiarlugu majuunneqartarluni.
- Massakkutut inissisimasoqartillugu inuit utoqqaat kaassuartakkani issiasut inuunerisa ulorianartorsiortinnerat sivisuallaalerpoq, massakkut iliuuseqartoqartariaqarpoq, Utoqqaat illersuisuat, Inga Egede KNR-mut oqarpoq.
Taassuma utoqqaat angerlarsimaffianni ikuallattoqassagaluarpat utoqqaat kaassuartakkaniittut arfinillit tamarmik anninneqapallassinnaanerat qularaa.
- Ataasiakkaarlugit ammukaassoraangamikkit majuartarfitsigut inunnit sisamanit kissumiarneqarlutik ammukartarpata periarfissaqanngiivittoqassaaq ikuallattoqaleriataassagaluarpat aneriataarnissamut, Inga Egede oqarpoq.
Illersuisup taama naliliinerminut maajip qaammataani Upernavimmi utoqqaat angerlarsimaffiannut pulaarnermini tummeqqat ikuallattoqassagaluarpat aqqutigineqartussat takusani tunngavilersuutigai.
Utaqqeqqissasut
Elevatori oktobarip qiteqqunnerani aaqqinneqassasoq, Avannaata Kommuniani ilaqutareeqarnermut ataatsimiititaliap siulittaasua, Bendt B. Kristiansen KNR-mut siusinnerusukkut oqarpoq.
AAMMA ATUARUK Utoqqaat angerlarsimaffianni elevatori ukiuni marlunni atorsinnaanngitsoq
Utoqqaalli inuunerminnik navianartorsiortut ukiuni marlunni utaqqereersut qaammat ilivitsoq sinnerlugu utaqqeqqissinnaanngitsut illersuisuat isumaqarpoq.
- Utaqqeqqissanngillat. Tuaviornerpaamik elevatori taanna aaqqeqqissinnaanngippat utoqqaat taakku allanut inissinneqartariaqarput, aneriataarnissamut periarfissalerlugit. Taavalu immaqa pisinnaanerusut allatut ajornartumik paarlaallugit qulaanut nuutsinneqartariaqarlutik, Inga Egede oqarpoq.
Itigartoq
Kissaataali tamanna Avannaata Kommuniani Ilaqutareeqarnermut ingerlatsivimmi pisortap, Aviâja Madsenip itigartippaa.
- Utoqqaat Illuani najugaqartut tamarmiusut pisariaqartitsisuupput immikkoortortanilu assigiinngittuni aamma immikkut peqqissutsimikkut ajornartorsiuteqarsinnaasarmata allanngortiterineq siunniunneqarsimanngilaq, taanna allakkatigut KNR-mut akivoq.