Utoqqaat angerlarsimaffianni elevatori ukiuni marlunni atorsinnaanngitsoq

Upernavimmi utoqqaat angerlarsimaffianni elevatori ukiuni marlunni kingullerni atorsinnaanngilaq. Utoqqaat kaassuartakkaniinnaq ingerlasut illoqarfimmut aninissaat killilipilussuuvoq. Anillatuarniartut tummeqakkut akiarneqartarput.

- Nalligisaqaara tassaniiginnarmat. Anninneqarsinnaanani, Upernavimmi utoqqaat angerlarsimaffianniittumik anaanalik, Jenny Hansen KNR-mut oqarpoq.

Taassuma anaanaata, Berthe Kristensenip 82-nik ukiullip timaata illua-tungaa nukeqanngilaq, kaassuartakkaniinnarlu ingerlasarpoq.

Taanna Upernavimmi utoqqaat angerlarsimaffianni quleriit pingasuusuni qullerpaami najugaqarpoq. Elevatorip ukiuni marlunni kingullerni atorsinnaanginnerani torsuusaq najukkani qimanngingajavippaa. Aninissamummi ima periarfissalutsigaaq, torsuusaq najukkani qimassaguniuk inunnit sisamanit akiarneqarluni tummeqqakkut aqqunneqartariaqarpoq, angerlaqqippallu majuunneqartariaqarluni.

Qulerinni qullerpaami najugaqartoq

Utoqqaat illuanni quleriit aappaa qullerpaavoq.

- Anninneqallatuarnikuuvoq eqqaamasanni ukiuni taakkunani marlunni marloriarluni, Jenny Hansen oqarpoq.

Taassuma arnaata KNR-imik oqaloqateqarnissamut akuersissuteqarfigaa.

Upernavimmi utoqqaat angerlarsimaffianni aqutsisup, Sara Karlsenip, elevatorip ukiuni marlunni kingullerni atorsinnaannginnera KNR-mut uppernarsarpaa. Taassuma Avannaata Kommunianut qinikkat ajornartorsiut pillugu oqaloqatigisarsimagaluarlugit aamma oqaatigaa. Oqaloqatigiinnerilli ajornartorsiutip aaqqinneranik maannamut suli kinguneqanngillat.

Elevatorilu aaqqeriaannaanngilaq. Taannami pisoqaangaarmat kingoraartissai pissarsiareriaannaanngillat. Kingoraartissanilli maanna Italiami nassaartoqarpoq - iluarsaassisussanillu oktobarip qiteqqunnerani Upernaviliartoqassalluni.

Avannaata Kommuniani Ilaqutareeqarnermut ataatsimiititaliap siulittaasua, Bendt B. Kristiansen (IA) oqarpoq. 

- Ajoraluartumik ilumoorsimavoq, taanna uanga aamma nammineq misissornerani paasivara. Taakkununnga eqqungaasunut ajuusaarnartupilussuuvoq taamatut aqqusaangaqartariaqarneri, taanna KNR-imut oqarpoq.

- Elevatori atorneqartoq nutaanngittorujussuusimammat ajoqutaata taartissaa imaaliallaannarlugu pissarsiassaasimanngilaq. Taartissaanik nunarsuarmi ujaasisimapput, Italiami nassaarisimavaat ujaasingaatsiaqqaarlutik. Suliarinnissinnaasumik aporfeqarsimasut aamma paasivara. Aammalu taanna iluarsiissutissaq tikereertoq, uge 42-milu ikkunneqarsinnaasoq nassuiaat pissarsiaralugu, Bendt B. Kristiansen oqarpoq.

Elevatorili taarserneqartariaqartoq taassuma nassuerutigaa.

- Nalilerneqarsimappat taarsertariaqartoq taava aningaasartai nanissuagut. Taamaanngippat najugaqarfigineqarsinnaanngitsutulluunniit nalilerneqaratarsinnaavoq. Taamaammat pilersaarut kinguarsaqattaarnagu ingerlanneqartussatut nalilerpara, Ilaqutariinnut ataatsimiititaliap siulittaasua oqarpoq.

Aneersuartarfik pujortartarfiusoq

Utoqqaat Illuanilu najugaqartut quleriiaanut siullermut nuutsinneqarnissaat imaaliallaannaq pisinnaanngilaq. Quleriiaannimi tassani errorsisarfeqarpoq, kiisalu inersuaqarlunilu igaffeqarluni. Najugaqartut quleriiaat aappaanni najugaqarput.

Jenny Hansenip arnaa utoqqarni aneernissamut periarfissaluttupilussuarni kisiartaanngilaq. Aqutsisummi oqarnera naapertorlugu utoqqaat illuanni najugalinni 20-it missaanniittuni arfinillit kaassuartakkanik ikiorseqqaarlutik ingerlasinnaapput.

Torsuusaq najugaat aneersuartarfeqarpoq. Taannali illoqarfimmut isikkiveqanngimmat Upernavimmi susoqarnersoq najugaqartut ilaasa isiminnik namminneq takusinnaanngilaat. Aneersuartarfik immamuinnaq isikkiveqarpoq.

- Nallinnaqaat. Nalligisarpakka neriuppunga aaqqiiffigineqarumaartut, Jenny Hansen oqarpoq.

Aneersuartarfik pujortarfigineqartarpoq. Jenny Hansenilli arnaa pujortarneq ajorpoq. Paniatalu silaannarissarnissamut periarfissalunnera artorsaatigisaqaa.

- Silaannarissarnissamulluunniit taama ajornartigisumut inissinneqarnera ilaqutaalluni artornarpoq. Oqaasertaleruminaappoq,  Jenny Hansen oqarpoq.