Israelip Københavnimi aallartitaqarfiata qanittuani marloriarluni qaartartumeerisoqartoq
Københavnimi Politiit Israelip Københavnip avannaani Hellerupimi aallartitaqarfiata qanittuani marloriarluni qaartartumeerisoqarneranik pingasunngornermi ullaakkut misissuipput.
Københavnimi politiit tusagassiortunut pingasunngornermi ullaakkut sassarnermi taama ilisimatitsipput.
- Israelip aallartitaqarfiata qanittuani unnuaq marloriarluni qaartartumeerisoqarpoq. Ajoqusertoqanngilaq.
- Politeerpaaluit qaartartumeeriffiusup nalaani misissueqqissaaleruttorput, Københavnimi politiit pisortaannut tullersorti Jakob Hansen tusagassiortunut sassarnermi oqarpoq.
Sumerpiaq qaartartumeerisoqarsimanersoq oqaatigisinnaanngikkitsik Israelilli aallartitaqarfiata qanittuani tassa qaartartumeerisoqarsimasoq, politiit pingasunngornermi ullaakkut ilisimatitsipput.
- Israelip aallartitaqarfiani soorunami misissuivugut. Qaartartumeerisoqarnera tassunga attuumassuteqarnersoq misissorparput, ilumulli taamaannersoq oqaatigissallugu siusippallaarpoq, Jakob Hansen oqarpoq.
Suut qaartinneqarsimanersut qanorlu sakkortutiginersut politiit aamma ilisimatitsissutiginngilaat.
Pisumut annilaarsimaqalutik politiilli suliami tassani misissueqqissaarnerat tuppallersaatigigitsik, Israelip Danmarkimi aallartitaqarfianeersut Facebookimi allapput.
Israelip Danmarkimi aallartitaqarfia Københavnip avannaani Hellerupimi Lundevangsvej 4-miippoq.
Israelimiut sakkutuui palæstinamiullu islamisiortut Hamasimeersut Gazami akersuutileruttorput. Tamatuma saniatigut israelimiut sakkutuui Libanonimilu islamisiortut Hizbollahkkunneersut aamma akersuupput.
Iran Hamasikkunnut Hizbollahkkunnulllu tapersersuisuusoq raketerpaalunnik Iranip ilaani marlunngornermi qaartartumeerinikkut aamma akuleruppoq.