Israelip illersornissaqarfia: Gazami sallunaveeqqutitut tiguakkat ilaat toqutaasimapput
Islamisiortut ingasaassiniat Hamasip sallunaveeqqutitut siorna tiguagaasa ilaat toqutaasimasut, Israelip illersornissaqarfiata oqaatigaa. Ilaqutaasullu ilisimatinneqareerput.
Israelip illersornissaqarfiata oqaaseqartitaa, Daniel Hagari, tusagassiortunut marlunngornermi katersortitsinermi taama oqartoq, nutaarsiassaqartitsivik DPA allappoq.
- Sallunaveeqqutitut tigummineqartut toqutaasimanerat ilaqutariinnut 31-nut ilisimatitsissutigaarput, taanna oqarpoq.
Ilaqutariit 31-t toqusoqarsimaneranik ilisimatinneqarsimasut taamaallaat ilisimaneqarpoq, sallunaveeqqutitut tigummineqartut 31-t toqutaasimanerat ilisimatitsissutigineqarnani.
- Sallunaveeqqutitut tigummineqartut sinnerisa qanoq issusiat ilaqutaasunut ilisimatitsissutiginikuuarput. Sallunaveeqqutitullu tigummineqartut sinnerisa angerlartinneqarnissaat pillugu suliaq ingerlateqqissavarput, Daniel Hagari oqarpoq.
Hamasip Israel siorna oktobarip ulluisa arfineq-aappaanni saassuppaa, inuit 1200-t toqutaallutik, allallu 240-t missaat sallunaveeqqutitut tigunneqarlutik.
Israel akiniaalluni Gazamik kingorna saassussivoq, inuillu 27.000-nit ikinnerunngitsut tassani toqutaanikuullutik. Gazami oqartussat Hamasimeersut peqqinnissaqarfiat taama nalunaaruteqarpoq.
Sallunaveeqqutitut tigummineqartut 31-t oktobarip ulluisa arfineq-aappaanniilli toqutaasimasut Israelimiut oqaatigigaat, USA-mi aviisit ilaat The New York Times marlunngornermi allappoq.