Gazami sallunaveeqqutitut tiguakkat nakorsaatinik tunineqarsinnaanissaannik isumaqatigiissusiortoqartoq
![](/sites/default/files/styles/image_934x467/public/2024-01/20240117-073957-L-6000x4000ma.jpg?itok=Rx4Q4sB4)
Gazap nakorsaatinik, ikiorsiissutinillu allanik pilersorneqarsinnaanissaa pillugu Israel Hamasilu isumaqatigiissusiorput, Hamasip, peqqarniisaarniartutut nalilerneqartup, sallunaveeqqutitut tigummiagaasa ilaasa nakorsaatinik tunineqarsinnaanissaat qulakkeerneqarluni.
Qatarip nunanut allanut tunngasunut ministereqarfia isumaqatigiinniartoqareersorlu taama ilisimatitsivoq.
Sallunaveeqqutitut Gazami tigummineqartut akornanni 45-t missaat nakorsaatinik pisariaqartitanik tunineqarumaartut nutaarsiassaqartitsiviup Reutersip allaaseraa.
Sorsuttut akornanni siorna novembarimili aatsaat isumaqatigiissusiortoqarpoq.
Frankrig isumaqatigiissitsiniartunut ilaavoq.
Israelip Gazamik saassussinera sakkortuallaarunnaariartortoq, USA-p isumannaallisaanermut ataatsimiititaliaata oqaaseqartitaata John Kirbyp marlunngornermi oqaatigaa.
Sakkuaakkunnaarallartoqarsinnaanissaanut tamanna neriullualersitsivoq, sallunaveeqqutitut tigummianik parnaarussaaqqasunillu paarlaasseqatigiittoqarsinnaanissaa neriuutigineqalerluni.
- Sukumiisumik maanna oqaaseqarusunngikkallarpunga, isumaqatigiinniartoqaleruttorporli, piffissamilu qaninnerusumi isumaqatigiissusiortoqarumaarpoq, Kirby oqarpoq.
Hamas Israelimik oktobarip ulluisa arfineq-aappaanni saassussimmat inuit 250-it missaat sallunaveeqqutitut taamani tigusarineqarput. Israelip oqarnera naapertorlugu taakkunannga 132-t suli Gazamiipput, amerikamiut taakkununnga ilaallutik. Sallunaveeqqutitulli tigummineqartut qasserpiaanersut nalornisigineqarpoq.