Israel: Gaza kujalleqalerpoq aamma Gaza avannarleq
Israelimi sakkutuut maanna nalunaarutigaat, Israelimiut Gazamut saassussinerminni, Gaza immikkoortunut marlunnut avissaartinnissaanut iluatsitsisimallutik, tassalu Gaza kujalleq aamma Gaza avannarleq.
Nutaarsiassaqartitsivik AFP taama nalunaaruteqarpoq.
Israelimiut sakkutuuisa illoqarfik Gaza maanna ungusimalerpaat, illoqarfimmullu iserternissaminnut piareersarlutik.
- Maanna Gaza kujalleqalerpoq aamma Gaza avannarleq, israelimiut sakkutuut oqaaseqartittagaat Daniel Hagari oqarpoq.
Tamanna sioqqullugu Israelimiut sakkutuuisa nalunaarutigaat, illoqarfiup Gazap unguneqarnera kingusinnerpaamik marlunngorpat naammassineqassangatinneqartoq.
Illoqarfimmi akeqqanik saassussineq piaarnerpaamik aallartinneqassaaq, Israelimiut sakkuui taama oqarput.
Sakkutuut aamma oqaatigaat, Israelimiut naalakkersuisuisa anguniagaasa piviusunngortinnissaat upperalugu.
Tassalu Gazami Hamasikkut aqutsinerat taakkualu sakkutuuisa piuneerutsinneqarnissaat. Ilanngullugu oqaatigaa, tamanna qaammatini arlalinni aatsaat pisinnaasoq immaqaluunniit ukioq ataaseq arlallilluunniit.
Palæstiinamiut 100 tusintilikkuutaat Gazap kujasinnerusortaanut qimarratereerput Israel oktobarip ulluisa arfineq aappaannili saassussilermat, Hamasikkormiullu akiniaallutik Israel qaartartunik saassutilermassuk.
Illoqarfimmi Gazami 2,3 miliuuninik inoqarpoq, amerikamiullu missiliunerat naapertorlugu inuit 400.000-it suli Gazap illoqarfianiipput.
Sakkutuujunngitsut maanna Gazap avannarpasinnerusortaaniittut Gazap kujasinnerusortaanukarsinnaatitaassasut, Israelimiut sakkutuuisa oqaaseqartitaat taama oqarpoq.
