Islandip filmiliornermik suliniuteqarnini iluaqutigigaa
Walter Mitty'p Kalaallit Nunaat takorusuttorujussuuaa, filmimili The Secret Life of Walter Mitty-mi tamanna piviusunngunngitsoorpoq. Taarsiullugu Nunatsinni immiussassat Islandimi immiunneqarput, Nunattalu Hollywoodimut takoqqusaarinissarsuarigaluani annaavaa.
Islandimiunuku susinnaagamik allaat Ben Stiller filmiliortuilu Nunatsinnukarnissaraluinut taarsiullugu Islandiliartissinnaagaat.
- Isumaqarpunga pissutaasoq Island filmiliornermut suliniuteqarami taaguutilimmik Film i Island. Suliniummi tassani filmiliortartut Islandimut suliartornissaannut pilerisaarneqartarput, Promote Islandimi pisortaq Inga Palsdottir oqarpoq.
Film i Islandimi islandimiut nunaminnut filmilioriartortut neqeroorfigisarpai Islandimi filmiliornerminni aningaasartuutimik 20 procentii utertissinnaagaat.
Aamma atuaruk Visit Greenland: Nunani allani filmiliortartut oqilisaanneqarlik
- Isumaqarpunga Kalaallit Nunaannut naleqqiulluta siuarsimanerulaarluta. Ukioq taanna Secret Life of Walter Mitty immiunneqareersorlu allanik aamma filmiliortoqarpoq, soorlu Oblivion, Interstellar. Nangeqattaartoq Game Thrones aamma maani immiunneqarnikuuvoq, aamma Fortitude, Palsdottir oqarpoq.
Oqaluttuarlunilu Fortitude issittumi nunat assigiinngitsut akornanni pisimasutut pissanganartuliaasoq Svalbardimi pitinneqartoq, taanna aamma Kalaallit Nunaanni filmiliarineqarsimasinnaangaluartoq. Taamaaliortoqannginneranullu aalajangersimasumik peqquteqartoq.
Aamma atuaruk Islandip Nunarput suleqatigiumagaa
- Isumaqarpunga imaassinnaasoq filmiliorneq pillugu attaveqallaqqinnerusimalluta, isumaqarpungali Kalaallit Nunaat aamma tamatumuuna periarfissarpassuaqartoq.
Maanili tamatta ilisimavarput Kalaallit Nunaat nunaasoq pinnersorujussuaq. Inga Palsdottirilli pakatsisittariaqassavaatigut oqarluni, isumaqarani filmiliassat namminneq takkunnavianngitsut.
- Misilittakkakka tunngavigalugit taama oqartariaqarpunga. Nunat tamarmik imminnut unammipput. Norgeliaraanni, New Zealandimut Irlandimulluunniit, nunani taakkunani aamma filmiliortunut aningaasanik utertitsisarput, unammillertoqaqaaq, Inga Palsdottir oqarpoq.
