Visit Greenland: Nunani allani filmiliortartut oqilisaanneqarlik
Tamanna atorluarneripput Visit Greenlandimi takornariaqarnermut siunnersortip Malik Milfeldtip apeqquserpaa.
- Filmini amerlasuuni Kalaallit Nunaat ilaanngilaq, aamma Kalaallit Nunaanni filmiliornikkut Kalaallit Nunaat pitsaasumik nittarsaanneqarsinnaavoq. Ice Cold Gold Kalaallit Nunaanni ingerlanneqaraluarpoq, kisianni Hollywoodimi filmiliortartut Kalaallit Nunaanni suli filmiliorusuttaraluarput, Malik Milfeldt oqarpoq.
Visit Greenlandimi takornariaqarnermut siunnersorti Malik Milfeldt isumaqarpoq pingaaruteqartoq nunani allani filmiliortartut Kalaallit Nunaannut filmilioriartortarnissaat orniginarsarneqaritariaqartoq.
Filminik tunisassiortartut angisuut, soorlu Hollywoodiminngaarnnersut, Kalaallit Nunaat ilaatillugu filmiliussagaangamik nunanut allamukarlutik filmilioriartortariaqartarput.
Assersuutigalugu quujasaarusiaq filmeq The Secret Life of Walter Mittymi inuttaq pingaarneq Nuummi Kalaallit Nunaanniissimavoq, tassani Air Greenlandip timmisartorsua takuneqarsinnaalluni, kisianni Kalaallit Nunaanni filmiliorneqarani Islandimi filmiliorneqarsimavoq.
Amerikamiut filmiliaat tusaamasat, soorlu Batman Begins, aamma James Bond Die Another Day Islandimi ilaatigut filmiliorneqarsimapput.
Kalaallit Nunaat ilaatillugu filmiliortussat illoqarfimmut illamut filmilioriartuinnartarsimapput. Nunatta isorartunera peqqutaatillugu angalanissap akisuallaarnera peqqutaatinneqartarpoq, Malik Milfeldt NORAp nittartagaani taama allappoq.
Nunani allani filmiliortartut nunatsinnukarnissaanik kajumissuseqarnerulersinneqassappata Naalakkersuisut filmkommissionimik, tassa filmiliornermut isumalioqatigiissitaliamik pilersitsisariaqartut, Visit Greenland isumaqarpoq
- Filmiliornermut isumalioqatigiissitaliamik tuniniaanermik annertusaasinnaasumik pilersitsisoqaraluarpat, filmiliortartut nunani allaninngaanneersut Kalaallit Nunaannut filmilioriartornissaannik oqilisaanneqarsinnaagaluarput. Taamaaliornikkut Kalaallit Nunaat nittarsaanneqarnerussagaluarpoq, Visit Greenlandimi takornariaqarnermut siunnersorti Malik Milfeldt taama naggasiivoq.
Aamma taanna isumaqarpoq akileraarutinik akikillisaanissaq Naalakkersuisut isumaliutigisariaqaraluaraat. taamaaliornikkut nunani allaniit filmilioriartortartut tikeraartittalernissaannut kajumissuseqalerniassammata.
