Islandimut killeqarfipput inissippoq
Isumaqatigiissut killeqarfiit erseqqarinnerulernerinik takorlooruminarnerulerinillu kinguneqartussatut siunertarineqarpoq, tassa siunissami pisuussutinik atuinermut atatillugu nunavittat akornanni killeqarfiit Naalagaaffiit Peqatigiit imarpinni pisinnaatitaafinnut isumaqatigiissusiaanut naapertuutissasoq oqaatigineqarpoq.
Naalagaaffiit Peqatigiit Imarpinni pisinnaatitaaffinnut isumaqatigiissutaa 1982-meersoq malillugu nunat imarpittaasa killeqarfii naliginnaasut 200 sømiliusut avataani nunavissuup killinga tikillugu piginnissinnaatitaapput.
Naalagaaffiilli ilai, soorlu Danmarkip Savalimmiut Nunarpullu akisussaaffigimmagit taakku nunavittarsuisa immap iluani killigi 200 sømil-iusut qaangerujussuarlugit killeqarfeqarput, nunavittarsuillu immap iluani killeqarfii sumerpiamiinnersut FN-ip immikkut kommisioniliaannut uppernarsartussaassavaat.
Nunattalumi Islandillu akornanni nunavittarsuit immap iluaniittut 22.000 kvadratkilometeriusut imminnut atammata siunissami killeqarfissat sumiinnissaat aalajangiunneqartariaqassaaq.
Isumaqatigiissullumi atsioqatigiissutigineqartoq malillugu siunissami killeqarfiit sumiinnerinik aalajangiiniarnermi suleriusissat sinaakkutissallu isumaqatigiissutigineqarput. Nunallu taakku marluk akunnerminni isumaqatigiinniarnerisigut tamanna pisassasoq isumaqatigiissutigineqarluni.
Illuatungeriilli nunavittanik piginnittussaatitaanermut tunngavilersuutigalugit uppernaarsaataat Naalagaaffiit Peqatigiit immikkut Kommisioniata takoqqaarlugit isumaqatigiissusiaat atuutsinneqalersinnaassaaq.
