Islandimiut præsidentertaarput
Ippassaq qinersisoqarnerani inernerit pisortatigoortut, Islandimi naalagaaffiup tv-qarfiata RUV-p saqqummiussaani takuneqarsinnaapput.
Johannessonip qinersinermi ajugaasuunini unnuaq nammineq nalunaarutigereerpaa.
Gudni Johannesson politikkikkut sulinermi nutaraavoq, præsidentimullu sassarniarnini ukioq manna maajimi nalunaarutigalugu. Islandip taamani statsmnisteriata Sigmundur Gunnlaugssonip Panami pappilissat pissutigalugit tunuarnerata kingorna Gudni Johannessonip sassarniarnini nalunaarutigaa.
Aamma atuaruk Islandimiut Frankrigimi arsaattut oqallisiginiarlugillu præsidentimut qinersipput
Johannesson partiit arlaannaannulluunniit ilaasortaanngilaq, attaviitsutut sassarluni. Islandimi politikkikkut sulinerup tatigineqaqqilernissaa qineqqusaarutigaa, maannamullu qinikkat nuannarineqannginnerat ilutigalugu tapersersorteqarluarsimalluni.
Johannesson ullumi 48-liilluni inuuissiorpoq, talimanillu meeraqarluni.
Taassuma Ólafur Ragnar Grímsson præsidentitut ukioq manna aggustip aallaqqaataani kingoraassavaa. Grímsson præsidentitut ukiuni 20-ni issiavoq.
/ritzau/