Islandimiut Frankrigimi arsaattut oqallisiginiarlugillu præsidentimut qinersipput

Islandip nunanut allanut unammisartui Frankrigimi EM-ertoqarnerani ilimagisamit ingerlalluarnerupput, Islandimiullu nuannattunnguupput, isikkamillu arsaalluni Europami pissartanngorniunnerit præsidentimut qinersisoqarnermut naleqqiullugu soqutigineqarneranut sunniuteqarsinnaasut, naalagaaffiit pissusiinut tunngasunut Reykjavikip Universitetiani professorip Baldur Thórhallssonip DR-imut oqaatigaa.

Islandip nunanut allanut unammisartui pissartanngorniutivinnerni aatsaat taama angusarissaartigipput, Østrigimullu ajugaanerat immikkut maluginiagassaavoq, unamminerummi naalivinnerani aatsaat isertitseqqimmata taamalu ajugaalutik.

- Inuit arsaattut oqallisigisorujussuuaat, suliffimminni, aqqusinermi, katerisimaarnerni angerlarsimaffimmilu, ikittuinnaallu qinersisoqarnera oqaluuserivaat, Baldur Thórhallsson oqarpoq.

Inunnik isumasiuinerit kingulliit takutippaat Gudni Thorlacius Johannessonip præsidentitut qinigaanissaa ilimanartoq, taannami tapersersorteqarluartoq paasinarmat.

47-nik ukiulik Gudni Johannesson 44,6 procentinit tapersersorneqartoq, qaninnertullu unammillertaa Halla Tómasdottir 18,6 procentinit tapersersorneqartoq, Islandimi tv-qarfiup RUV-p inunnik isumasiuisitsisimanerata takutippaa.

Qinersinermi ajugaasup maannamut præsidentiusoq Ólafur Ragnar Grímsson kingoraassavaa.

/Ritzau/DR