Islandimiut akerliujuarsinnarput: Qinersisoqarnissaa piumasaraat
Inuimmi 2000-it missaat Altingip ataatsimiittarfiata saavani ippassaq katersuupput, allagartarsualisaarput, tumerparpaartoqarlutik piaarnerpaamillu qinersisoqartariaqarneranik piumasaqarlutik.
Suliffeqarfiit inuillu ataatsiakkaat Panami eqqartuussissuserisoqatigiit aqqutigalugit akileraarutikinnerunissartik pillugu aningaasanik Panami inissiisarsimanerannut pappilissat saqqummiunneqaqqammersullu Islandimi innuttaasut politikkikkut pissutsinik naammagisimaarinninngeqaat, ministeriunertummi maanna tunuartup Sigmundur David Gunnlaugssonip akileraarutikinneruniarluni aningaasanik Panamami inissiisarsimanera aamma paasinarsimmat.
Gunnlaugssonili pisuunngitsuuneraannavippoq, politikkikkulli tatisimaneqarnini pissutigalugu ministeriunertut nammineq tunuarniuteqarluni.
Aamma atuaruk VIDEO Kalaaleq malinnaasoq: Islandimiut qinerseqqikkusupput
Partii Piratpartiet, inatsisartunut qinersisoqarnissaanut inunnik isumasiuinerit naapertorlugit ajugaasussatut isikkoqartoq, Islandimi naalakkersuisunut tatiginninnginnermik Altingimi ippassaq takutitsipput.
Partiilli naalakkersuisuutitaqartut talerperliit inatsisartuni suli amerlanerussuteqangaatsiarput, Piratpartietillu tatiginninnginnermik takutitsinera itigartinneqarluni. Piratpartietip iliuuserisai takussutissaannartut nalilerneqarput.
- Pissutsit ullumikkutut ingerlaannassappata tatiginninneq qanoq ililluta pilerseqqissinnaavarput? Piratpartietip siulittaasua Birgitta Jonsdottir, Tuluit nutaarsiassaqartitsiviannut Reutersimut taama ilaatigut aperivoq, nangillunilu:
- Nunani tamalaani illaruaatigineqarpugut, ministerunerusimasoq pillugu illaruaatigineqarluta, Jonsdottir oqarpoq.
Islandimi ullumi qinersisoqartuuppat Piratpartiet 43 procentinit taaguunneqassagaluartoq, inunnik isumasiuisartut Visirikkut misissuinerisa takutippaa.
/ritzau/
