Danmark milliardilikkuutaanik Ukrainemut tunissuteqartoq
Ukrainemi 2022-mi februaarimi sorsuttoqalermalli Danmark Ukrainemut 18-issaa aningaasanik maanna tunissuteqarpoq, tamatumuuna 5,6 mlliardit koruuninik tunissuteqarluni.
Aningaasat taakkua silaannakkut saassussisoqarnerani illersuutinut sakkullu imassaannut atorneqassapput.
- Ukraine silaannakkut saassunneqarnermi imminut illersorniarnermini sakkussanik amigaateqartoq tamatta nalunngilarput. Uagut peqanngilagut, aningaasaateqarpugulli, Danmarkip nunanut allanut tunngasunut ministeria Lars Løkke Rasmussen (M) oqarpoq.
Danmarkip Ukrainemut tunissuteqarnera sorsuffimmi malugineqarsinnaajumaartoq, illersornissamut ministerip Troels Lund Poulsenip (V) oqaatigaa.
Ukrainemi sakkussanik tunisassiortunit 1 milliardit koruunit nalinginut pisiortornissamut immikkoortinneqartut, taassuma ilanngullugu oqaatigaa, Danmarkilu nunani siullersaalluni taamaaliortoq.
Ukrainep aningaasarsiornerata ajalusooratarsinnaanera taamaasilluni pinngitsoortinneqarsinnaasoq, taanna aamma oqarpoq.
Danmarkip Ukrainemut tunissuteqaqqinnera Ukrainep præsidentiata Volodymyr Zelenskyj-p inoqatinut attaveqaqatigiittarfikkut X-ikkut qujassuteqarfigaa.
