Afghanistanimi qarsutsinersuarmi inuit ikinnerpaamik 50-it ajunaartut

Siallerujussuareernerata kingorna qarsutsinersuaqarpoq, qasutsinernersuup kingunerisaanik inuit ikinnerpaamik 50-it ajunaarsimapput.

Ippassaq sialussualernerata kingunerisaanik, aqquserngit amerlasuut aqqutigineqarsinnaajunnaarput.

Afghanistanimi Ghor-ip nunap immikkoortuini paasissutissiinermut immikkoortortaqarfiani aqutsisoq, Nutaarsiassaqartitsivimmut Reutersimut taama oqarpoq.

Paasissutissat oqaatigineqartut naapertorlugit, inuit aqqunartitsersimasut amerlassusaat ilisimaneqanngilaq.

Nunap immikkoortuini Ghorimi, illut 2000-it sequmipput, 4000-it allat ilaannakortumik sequmissimallutik.

Pisiniarfiit 2000-init amerlanerusut qarsussaasimapput, taakkulu nunap immikkoortuani illoqarfimmi pingaarnersimi Firozkoh-imiipput.

Silap pissusiata allanngoriartornerata kingunera

Naalagaaffiit Peqatigiit Afghanistani - nunarsuarmi nunat piitsuunerpaat ilaat - silap pissusiata allanngoriartorneranik eqqornerlunneqariaannartut isigivaat.

Afghanistani qarsutsinersuarnik annertuumik sakkortuunillu eqqungaasaqattaarpoq.

Nunami tamarmi ukiuunerani panernersuaqarsimavoq, nunap panerpallaarnerminik sialuk milluarsinnaanngilaa, tamannalu pissutigalugu qarsutsinissamut aarlerinartorsiortitsivoq.

Sapaatip akunnerata siuliani qarsutsinersuaqarpoq, tamannalu sianllerujussuarsimaneranik kinguneqarportaaq, nunaqarfik Aghanistanip avannarpasinnerusortaaniittoq eqqorneqarpoq.

Inuit 315-it ajunaarput. Qarsutsinersuami aqqunartut 1600-t sinnerlugit amerlassuseqarput.

/ritzau/