Islandimi qeqertaasami innermik anitsisoqaqqittoq

Islandimi innermik anitsineq arfininngornermi aallartippoq, Islandimiut silasiorfiat taama paasissutissiivoq.

Islandimi innermik anitsinerit  decemberimili aallartimmata sisamassaa innermik anitsisoqarpoq.

- Mianersoqqussut Reykjanesimi  innermik anitsineq aallartippoq, Islandimi silasiorfiup nittartartagaani taama allassimavoq.

Qeqertaasami Reykjanesimi Reykjavikkip kujasinnerusortaani innermik anitsingajalersoqarsinnaanera  sapaatit akunneri arlallit matuma siorna oqartussaasunit aarlerisaarutigineqareerpoq.

Tamannalu arfininngornermi aallartippoq. innermik anitsinermit assilisat islandimiut tusagassiorfianni RUV-mi takuneqarsinnaapput, innermik anitsinermit laava silaannarmut pisoq, unnuakkullu assilissani qilak aappaluartunngorsimasoq.

Innermik anitsineq timmisartut angalanerannut kinguneqarnavianngitsoq nalunaarutigineqarallarpoq.

 Keflavik-ip timmisartoqarfiata nittartagaani allasimavoq timmisartut aallartarnerannut tikittarnerannullu mittarfik suli ammasoq.

Qeqertaasami Reykjanesimi ukiuni kingullerni 800-ni innermik anitsisoqarnikuunngilaq.

Reykjanisimi eqqanilu 2021-mili arfineq marloriarluni innermik anitsisoqarpoq 

Kingullermik februarmi innermik anitsisoqarmat, innuttaasut tamaani najugaqartut 20.000-it kiassarneqarsinnaasimanngillat, aqquserngit innaallagissallu aqqutaat lavamit aqqusaarneqarlutik aserormata.

Jannuaarip qaammataani innermik anitsisoqarmat illoqarfimmi aalisartoqarfimi Grindavikkimi illut arlaqartut nungullutik ikuallapput.

Innermik anitsineq arfinngormat allartittoq pissutigalugu,  Grindavikkimi innuttaasut qimagussortinneqalersut, najukkani tusagassiorfiit taama allaaserisaqarput.  

Reykjanesimi innutaasut novemberip aqqarngani qimagussortinneqarnerisa kingorna februaarip ulluisa 19-anni utersinnaatitaalerput.

Qeqertaasami Reykjanesimi innermik anitsineq sakkortuunik innernik aniatitsilernavianngilaq arsakulluunniit silaannarmut siaruaannavianngillat.

Innermilli anitsinerit ukiut qulikkaat tulliuttut ingerlaannarnissaat ilisimatuut ernummatigaat, taamaattumik illut nunamilu atortut ulorianartorsiortut illersorniarlugit oqartussaasut qarmanik ungalulersuipput

Innermik anitsineq aallartippoq unnukkut qulingiluanut tanneq tallimanngulersoq,

Innermik anitsiffiup qanillattorneqannginnissaa kaammattuutigineqaraluarpoq, innermilli anitsisoq takusinnaanerujumallugu qanillattorneqartartoq, RUV taama allaaserisaqarpoq.