Korea Kujalliup præsidentia sukannersumik naalakkersuisoqarnissaanik nalunaaruteqartoq
Korea Kujallermi sukannersumik naalakkersuisoqarnissaa, Korea Kujalliup præsidentiata Yoon Suk-yeolip tv-kkut aallakaatinneqartukkut marlunngornermi unnukkut oqalugiarami nalunaarutigaa.
Nunami tassani illuatungiliuttut Korea Avannarlermik iluarinnittutut taavai, Korea Avannarlermillu tapersersuisut sakkutuuisa piuneerutsinnissaat ilaatigut nalunaarutigalugu.
Korea Kujallermi sukannersumik kingullermik 1980-imi naalakkersuisoqartoq, nutaarsiassaqartitsivik Reuters allappoq.
Partiit sulisinnaajunnaarlutillu nunami tassani inatsisartuni sulineq inerteqqutaalersoq Korea Kujalliup illersornissaqarfiata nalunaarutigigaa, nutaarsiassaqartitsivik Yonhap allappoq.
Nutaarsiassaqartitsiviit saqqummersitsiviillu illersornissaqarfimmit aqunneqassasut, sakkutuut aqutsisoqarfia nalunaarpoq.
Korea Kujallermi nunap inatsisaa tunngaviusoq naapertorlugu aqutsisoqarnissaa qulakkeerniarlugu sukannersumik naalakkersuisoqarnissaa nalunaarutigineqartoq, præsidentip oqaatigaa.
Nutaarsiassaqartitsiviup Yonhapip allaaserisaa naapertorlugu inatsisartut illoqarfiit pingaarnersaani Seoulimi ataatsimiittarfiata matua assersorneqarpoq. Inuit politiillu aporaattut assit aamma takutippaat.
Sakkutuut inatsisartuni atorfilittanit peersinniarneqaraluartut assit tv-kkut aallakaatinneqartut aamma takutikkaat, nutaarsiassaqartitsivik Reuters allappoq.
