Islandimi qaqqaq innermik anitsisartoq ukioq manna aappassaanik anitsisoq
Islandip kimmut kujasissortaani qaqqaq innermik anitsisartoq ukioq manna aappassaanik anitsivoq.
Islandimi tv-qarfik RÚV taama allaaserisaqartoq nutaarsiassaqartitsiviup Reutersip aamma allaaseraa.
Qaqqaq innermik ukioq manna siullermik januaarip ulluisa 14-ianni anitsilerpoq, ullut marluk missaanni anitsilluni.
Lava aalisartut illoqarfiata Grindavikip eqqaanut annguppoq. Grindavikimi innuttaasut 4000-t siusinnerusukkut qimagussorneqarput.
Qaqqap Grindavikip eqqaaniittup innermik anitsinera Grindavikimut innuttaasuinullu qanoq kinguneqassanersoq maannangaaq ilisimaneqanngitsoq Reutersip allaaseraa.
Islandimi silasiortuni geofysikerip Kristín Jónsdóttirip RÚV-mut oqarnera naapertorlugu qaqqap innermik siorna decembarimi anitsiffigisaata nalaani maanna quppaqalersimavoq innermillu tassani anitsisoqalerluni.
Grindavikimit avannamut qaqqaq Sundhnúkimik taaguutilik innermik anitsilerpoq, nunap attaveqaasersugaaneraniillu ungasissumi innermik anitsisoqalerluni. Nunap attaveqaasersugaaneranik eqquinaviannginneratut maanna isikkoqartoq geofysikerip oqaatigaa.
Takornarniat Grindavikip ungasinngisaani ornigarluartagaat Den Blå Lagune matoqqatinneqarallartoq RÚV-p oqaatigaa, inuillu tamaani akunnittarfinnittut qimagussorneqarsimasut aamma oqaatigineqarpoq.
