Islandimi nuna 880-eriarluni sapaammi sajuttoq
Islandimi Reykjanesip qeqertaasaani nuna unnuap qeqqata ullaarlu nalunaaqutaq arfernup akornanni 880-eriarluni sajuppoq.
Islandimi nutaarsiassaqartitsivik RÚV taama allaaserisaqarpoq.
Nunap sajuttaqattaarnera Richterip nunap sajuttarneranik uuttuutaa naapertorlugu 3 ataattarpaa. Nunap ullut kingulliit marluk sajuttarneranut naleqqiullugu taamaasilluni sakkukinnerusarsimavoq.
- Nunap sajuttarnera kuammut kimmut siaruaatinngilaq. Grindavikimit avannamut kangimut nuna sajunnerusarpoq, nunallu sajuttarnera suli uninngilaq. Ilimagisatsituut pisoqarpoq.
Elísabet Pálmadóttir, Islandimi silasiortut pinngortitami ernumatitsisinnaasut pillugit immikkut ilisimasalik nutaarsiassaqartitsivimmut RÚV-mut oqarpoq.
Reykjanestámit kujammut 6 kilometeritut ungasitsigisumi nuna nalunaaqutaq arfineq-pingasunngorsimatsiaannartoq sajummat nuna Richterip nunap sajuttarneranik uuttuutaa naapertorlugu 3,7-imik sajuppoq.
Lava Grindavikip ataani 15 kilometeritut isortartutigisumik ingerlaartoq 800 meteritut ititigisumiittoq ilimagineqarpoq.
Illoqarfiup Grindavikip, Reykjanesip qeqertaasaaniittup nalaani nuna tallimanngornermi sajuttaqattaarmat tamaani innuttaasut qimagussorneqarput.