Islandimi ministeriuneq tunuarnianngilaq
Ministeriunerup ilaqutaatatalu aningaasat amerlasuut akileraarutigineqartussat peqquserluttuliornikkut toqqorsisimaneranik pasilliisoqarnerata kingorna, tunuarnissaannik piumasaqartoqalerpoq.
Tusagassiorfiit arlaqartut taama allaaserisaqarput.
- Pineqartoq pillugu tunuarnissannik isumaliuuteqanngilanga, taannalu pillugu tunuarnavianngilanga, ministeriuneq Islandimi TV-qeqarfimmi Kanal 2-mi apersorneqarluni taama oqarpoq.
Aamma atuaruk Islandimi ministeriunerup akileraarutikinneruffiusumik atuisimanera qulaajaaffigineqartoq
Islandimi illuatunguliuttut ministeriunermut Sigmundur David Gunnlaugssonimut tatiginnikkunnaarnermik taasisitsisoqarnissamik isumaqatigiipput, akileraarutinik peqquserluttuliorsimanernik pasillernerit Panama-pappiaqqanik taagorneqartut nunat tamat tusagassiorfiini suleqatigiissuni sapaammi unnukkut tamanut saqqummiunneqarnerisa kingorna.
- Neriuutigaara tatiginnikkunnaarnermik siunnersuut saqqummiunneqassanngitsoq Sigmund Davidilu Altingemi ataatsimiinnissaq sioqqullugu tunuarumaartoq, Birgitte Jonsdottir oqarpoq.
Peqquserluttuliornerit paasineqartut tassaapput, eqqartuussissusserivimmi Panamamiittumi Mossack Fonsecami pequsserluttuliorsimanermit takussutissat 11 millioninik amerlanerusut saqqummiunneqarmata, taakkualu nunarsuarmi aningaaserivinni aningaasaqarnermilu suliaqartuni arlalinni sapaammi unnukkut aalassatitsipput.