Islandimi ministeriunerup akileraarutikinneruffiusumik atuisimanera qulaajaaffigineqartoq
Tyskit aviisiisa ilaata Süddeutsche Zeitungip sapaatip-akunnerata naanerani pappilissat takussutissat katillugit 11,5 millionit saqqummersippai.
Suliffeqarfiit, aningaaseriviit, inuinnaat, timersortartut nuimasut inuillu allat peqquserluttuliorsimasutut pasineqarput.
Islandillu ministeriunerunerata Sigmundur Gunnlaugssonip akileraarutikinneruniarluni aningaasanik peqquserluttuliornikkut toqqorsisimasutut siusinnerusukkut pasineqarsimasup taamaaliorsimagunarneranik aamma pasineqarpoq.
Taassuma Mossack Fonseca peqatigalugu suliffeqarfik sinerissap avataani uuliasiornermik sulialik pisiarisimavaa, suliffeqarfimmillu pisineq isertuussimallugu. Suliffeqarfimmik pisisimanini Sigmundur Gunnlaugssonip Islandimi inatsisartunut aamma ilisimatitsissutigisimanngilaa, suliffeqarfillu nuliaminut 1 dollarilersillugu 2009-mi kingorna tunisimallugu.
Aamma atuaruk Nunatsinni peqquserluttuliortarnermut misissuineq aallartingajalerpoq
Islandimi naalagaaffiup aningaasaataarutilernerata nalaani aningaasanik millionilikkaanik suliffeqarfik aqqutigalugu nunanut allanut 2015-ip tungaanut nuussisarsimaneragaavoq, norskimmi aningaaserivissuata DNB-p aningaasat millionilikkaat akileraaruseqqaarnagit assersuutigalugu Seychellerinut ukiuni kingullerni qulini nuuttarsimavai, aningaaserivissuarmillu aqutsisut iliuuserisimasatik peqqissimissutigigaat, Norgemi aviisit ilaannut Aftenpostenimut allaaserineqarpoq:
- Suliffeqarfimmik taamaattumik suleqateqartutut ilisimaneqarnerput akueriumasatta killinganik misiliineruvoq, DNB-p pisortaa Tom Rathke Aftenpostenimut oqarpoq.
Ruslandip præsidentia Vladimir Putin milliardilikkaanik peqquserluttuliorsimasutut aamma pasineqarpoq, soorlu aamma nunani avannarlerni aningaaseriviit annersaat Nordea peqquserluttulioqataasimasinnaasutut pasineqartoq.
