Isiginnaartitsisarfimmi aqutsisoq ilisimatoorlu Kraks Blå Bogimut ilanngunneqartut
Kraks Blå Bogimut ilanngunneqartut tassaapput Nunatta Isiginnaartitsisarfiata aqutsisua Susanne Andreassen aamma ernisussiornermik Ph.d-lik kulturimillu pikialaartitsisartoq Ruth Montgomery Andersen.
Taakku inuit 173-it allattorsimaffimmut ataqqinaataasumut ilanngunneqartuni akornanniipput.
AAMMA ATUARUK Nathanielsen Kraks Blå Bogimut ilanngunneqartoq
Inuit allattorsimaffimmut ilanngunneqartut suliaminni annertuumik sunniuteqarsimasuupput tassuunatigullu inuiaqatigiinnut pitsaasumik sunniuteqaqataasimallutik.
Savalimmiormiut pingasut aamma ilanngunneqarput, tassaallutik folketingimut ilaasortaq Sjúrdur Skaale, erinarsortartoq Eivør Pálsdóttir assilialiortorlu Hansina Iversen.
Nunatsinni Pinerluttunik Isumaginnittoqarfiup pisortaa, Naaja Nathanielsen, Kraks Blå Bogimut, nunatsinnut attuumassuteqartuni, siorna aamma ilanngunneqarpoq.
AAMMA ATUARUK Berthelsen Uldumilu Krakip allattorsimaffianut ilanngunneqartut
Nunatsinneersunillu allattorsimaffimmiittut suli inuusut 90-iupput.
Kalaallit nuimasut ilanngunneqarnikut ilaatigut tassaapput Naalakkersuisut Siulittaasuat Kim Kielsen, atuakkiortoq Naja Marie Aidt, Visit Greenlandip pisortaa Julia Pars erinarsortartorlu Julie Berthelsen.
Atuakkami digitalinngorlugu saqqummersinneqartumi inuit 30.000-ingajaat allattorneqarsimapput, taakkunanngalu 8.500-t missaat suli inuupput.
Inuit atuakkami ilanngunneqartut pingajorarterutaat sinnilaarlugit arnaapput, taakkunannga marluk nunatsinneersuullutik.
AAMMA ATUARUK Berthelsen Uldumilu Krakip allattorsimaffianut ilanngunneqartut
