Nathanielsen Kraks Blå Bogimut ilanngunneqartoq
Kraks Blå Bog, inunnik nuimasunik allattorsimaffiusoq, nutarterneqaqqammerpoq.
Allattoq Anton Gundersen Lihn
juunip 12-at 2017 11:40
Nutserisoq Simon Uldum -
Inuit 178-it tamatumuuna allattorsimaffimmut ilanngunneqarput, taakkulu nunatsinneersumik ilaqarput.
Pinerluttunik Isumaginnittoqarfiup pisortaa, Naaja Nathanielsen, allattorsimaffimmi inuit Nunatsinnut attuumassutillit ilagilerpaat.
Nunatsinneersunillu allattorsimaffimmiittut suli inuusut siorna 87-iupput.
Taakku ilagaat folketingimut ilaasortaq Aaja Chemnitz Larsen, KNI-p pisortaa Peter Grønvold Samuelsen, eqqumiitsuliortoq Bolatta Silis-Høegh erinarsortartorlu Julie Berthelsen.
Atuakkami digitalinngorlugu saqqummersinneqartumi inuit 30.000-ingajaat allattorneqarsimapput, taakkunanngalu 8.500-t missaat suli inuupput.
