Iranimi qaartartuumeriniartoqannginneraapput

Iranimi præsidenti Mahmoud Ahmadinejad, qaartartumeeriffigitinnerminit aniguivoq.

Nutaarsiassaqartitsiviit arlalissuit taama allaaserisaqarput, naak Iranimi oqartussat nittartakkaminni taamaattoqannginneraagaluartut. Oqartussat oqarput qaartartuunerakkat tassaasut nalliuttorsiornermi qummoroortartut.

Nutaarsiassaqartitsiviup Reutersip allaaserisaa naapertorlugu, præsideni Ahmadinejad, Iranip kiterpasissuani illoqarfimmi Hamadanimi oqalugiartussaatillugu qaartartumeerineq pisoq.

Angutip qaartartoq nammineq sanaaq præsidentip ingerlaaqataasalu biiliisa tungaannut miloriussimavaa, nutaarsiassaqarfiillu arlallit oqaluttuaraat, qaartartoq arlalinnik ajoqusiisoq, allaat tusagassiortut præsidentillu atorfilittai eqqorneqarsimallutik. Bussit mikisut tusagassiortut issimaffigisaasa ungasinngisaanni qaartartoq qaarsimavoq. Bussit taakku Ahmadinejadip malittaanut ilaapput, præsidentip biilerisaanit 100 meeteriinnarnik ungasissuseqarsimallutik.

Qaartartumeerisoq tigummigallagaavoq. Præsidentilli Ahmadinejad oqalugiarami pisimasoq oqaatsimik ataasinnguamilluunniit eqqaanngilaa.

Iranimi oqartussat tuluttut paasissutissiisarfiata præsidenti toqoriarneqarsimannginnerarpaat, oqarlutik qummoroortartortoqaannarsimasoq.