Inuusuttut suliffissaaleqisut amerliartupiloorput
Oqaatsit kusanartorpassuugaluartut inuusuttut suliffissaaleqinerat qanoq iliuuseqarfigineqanngitsutut ippoq. Naalakkersuisooqatigiimmi atuutilernerisa kingorna inuusuttut suliffissaaleqisut marloriaatinngorsimapput.
- Tamanna ajorpoq. Amerlavallaat ilinniakkamik aallartitsineq ajorput taamatut suliffissaaleqisutut nalunaarsorneqartarlutik. Tamanna aaqqiiniarfigisariaqarparput, tassami inuusuttut ilinniagaqarnissamut periarfissaat aatsaat taama pitsaatigaat. Kommuuni kujallermi inuusuttut ingerlaqqitsinniarlugit iliuuseqarput tamatumalu kommuunini allani ingerlalernissaa anguniartariaqarparput. Inuusuttut suliffissaaleqisut tassaakkajupput suliffissaaleqisunik angajoqqaallit, taamalu ingerlaneq piaarnerpaamik kipitinneqartariaqarpoq, Demokraatit sinnerlugit Inatsisartuni ilaasortaq Anda Uldum oqarpoq.
Siornatigut naalakkersuisunut siuuttut Siumukkormiut inuusuttut suliffissaaleqinerujussuat quarsaarutigaat, tassami 2009-mi suliffissaaleqineq aatsaat taama appasitsigisimagaluarmat. Taamaammat inatsisartut kajumissaarpaat ataatsimoorluni ajortorsiummik qaangiiniaqqullugit.
- Akuersaarneqarsinnaanngilluinnarpoq pissutsit taamaalersimanerat. Inuusuttut taakku inuiaqatigiinni pisuussutaapput pingaarutilerujussuit taakkulu annaaneqassanngilluinnarput. Inuussutissarsiortut arlaannik iliuuseqartariaqarput inuusuttut suliffissaqalernissaat qulakkeerneqarniassammat. Politikkeritut aamma maannakkornit iliuuseqarnerusariaqarpugut. Imarsiornermut ilinniarfik Paamiuniittoq 90-nik qinnuteqaateqartoqaraluarpoq Nuummulli nuuttussanngormat taamaallaat 30-it ilinniartunngorsinnaallutik. Ilinniartunnginngitsut suliffissaaleqisunngorput. Taamaammat suliffissaqartitsiniarneq pingaarneruvoq ilinniarfiit Nuummut eqiterneranniit, Kim Kielsen Siumut sinnerlugu inatsisartut inuussutissarsiornermut ataatsimitiilaasortaq oqarpoq.
