Inuusuttut qanoq angerlarusulersissavagut?
![](/sites/default/files/styles/image_934x467/public/article_images/avalak_630_2.jpg?itok=td6q_zJQ)
Tamatumunnga suna pissutaanersoq Siumumit paaserusunneqarpoq.
Inatsisartut ullumi ataatsimiinneranni Siumut saqqummiussissaaq, inuusuttut ilinniarluarsimasut Nunatsinnut utertinniarnissaat pillugu, Kalaallit Nunaat anguniagassanik qanoq ittunik siunniussaqarnersoq apeqquteqaat aallaavigalugu siunnersuut oqaluuserineqassammat.
- Siumumit neriuutigaarput, inuusuttortatta ilinniarnerminni naammassereerlutik Nunatsinnut angerlarnissaasa qanoq qulekkeerneqarsinnaanera pillugu, paqumisugata oqallisissasugut. Tassami akissarsiaqarlutik sulisunut, atugarissaarnermik tamatta angujumasatsinnik qulakkeereqataallutik Nunatsinnut ilanngunniassammata, Inatsisartuni ilaasortaq, Per Berthelsen Siumumeersoq oqallisissatut taama siunnersuuteqarpoq.
Nunani allani ingerlariaqqiffiusunik ilinniartut 2010-mi 550-it, ilinniagaqarnermut atatillugu tapiissutisisimapput.
Inuusuttut ilinniakkaminnik naammassinnereernermik kingorna, Nunatsinnut uteqqinneq ajortut qasserpiaanersut kisitsisaatigineqanngilaq. Tamatumunnga pissutaavoq, ilinniarneq naammassigaangat tapiissutillu unitsinneqaraangata ilinniagaqartut malinnaaffigineqarnerat unittarmat.