Politiit ullormut nalunaarusiaat: Inuusuttut pingasut Nuup umiarsualiviani biilertillutik immamut nakkarput
Biilinik Nuup umiarsualivianiit immamut nakkartoqarsimaneranik marlunngornermi ullaassakkut nalunaarfigineqarsimallutik, Kalaallit Nunaanni Politiit pigaartuisa ittuat Ole Hald oqarpoq.
Nakkutilliisoq biilit immamut nakkarsimasut aamma angutit marluk arnarlu ataaseq immamit namminneq qaqisimasut takugamigit politiinut marlunngornermi ullaassakkut arfinermut tanneq qulingiluanngorluinnalertoq nalunaarutigai.
- Annerusumik ajoqusertoqanngilaq, inuusuttullu immamut nakkarsimasut tamarmik 18-it 22-llu akornanni ukiuliusut Dronning Ingridip Napparsimmaviliaanneqariarlutik maanna isumagineqarsimalereerput. Taakku tamarmik ajoquserujussuarsimasortaqanngillat, politiit pigaartuisa ittuat oqarpoq.
Inuusuttut taakku Nuup umiarsualiviata matoqqasuata eqqaani, tassa Aqqusinersuup isuata talittarfiup ungasinngisaaniittup nalaani biilertillutik immamut nakkarsimasut, politiit pigaartuisa ittuat ilisimatitsivoq.
- Inuusuttut taakku biilertillutik immamut nakkarnerannut suna pissutaasimanersoq suli paasinngilarput. Allanilli ilaasoqarsimanngitsut uppernarsivarput, Ole Hald oqarpoq.
Biilit atorsimasaat suli immamiittut marlunngornermili ullaap tungaani qaqinneqangassangatikkitsik qaqinneqarsimaleriarpatalu misissuileriarunik inuusuttut pingasut taakku killisiussagitsik, Ole Hald ilisimatitsivoq.
- Biilit atorsimasaat aallarunneqarsimasuugunavipput, taakkuninngalu ingerlatsisoq biilinik ingerlatsisinnaanermut aamma allagaqartaqanngimmat inuusuttut pingasut taakku biilit qanoq pissarsiarisimaneraat killisiorneranni paasiniassavarput, taanna oqarpoq.
Allanik ulapputeqanngitsut
Nuummi marlunngornermi ullaassakkut pisoq eqqaassanngikkaanni politiit marlunngornermut unnuaani allanik ulapputeqarsimanngillat. Nuummili piffissami kingullermi tulliniaqaqattaarmat Nuummi sumiiffinnut assigiinngitsunut kaaviiaartaarsimapput.
- Tillinniarfigineqakkajuttut soorlu atuarfiit pisiniarfiillu kaaviiaarluta alaatsinaappavut, politiit pigaartuisa ittuat Ole Hald oqarpoq.
Kaaviiaartillutilli naammaattoorsisimanatik sulili alaatsinaallutik, taanna oqarpoq.
