Inuusuttut paaqqutarilluartariaqarpagut
Maanna Inatsisartut ilaqutariissutsimut peqqissutsimullu ataatsimiititaliaata naalakkersuisut arlaannik iliuuseqaqquai. Ataatsimiititaliap piumasaraa iliuusissat tigussaasut aqqutigalugit meeqqat inuusuttut angajoqqaallu ingerlariaqqinnissamut periarfissarsiuunneqassasut inuiaqatigiit ineriartorneranni isumalluutigineqarsinnaalerlutik.
- Tamanna pinngitsoorata eqqumaffigisariaqarparput. Pingaaruteqarluinnarpoq ajornartorsiutit taama ittut qaangerneqarnissaat, taamaattoq oqaatigisinnaanngilara ajornartorsiut sumi pilersimanersoq aammalu kikkut pisuunersut. Tamanna aamma pingaarnerunngilaq. Pingaarneruvoq ajornartorsiutip eqqumaffigineqarnissaa aammalu annertusinnginnissaata qulakkeerneqarnissaa. Taamatut pisoqaqqinnginnissaa anguniarlugu ajornartorsiutit taama ittut siunissami takkuteqqinnginnissaat qulakkeertariaqarparput, ilaqutariinnermut peqqissutsimullu ataatsimiisitaliap siulittaasua Olga P. Berthelsen IA-meersut KNR.gl-mut oqarpoq.
Ataatsimiititaliap kissaatigaa ajornartorsiutip qaqilerneqarnerani sunniuteqarnissaq. Meeqqat inuusuttullu pillugit peqqussut aappaagu nutarterneqartussaavoq, tamatumalu suliarineqarnerani ataatsimiititaliap sunniuteqarnissaa Olga P. Berthelsenip kissaatigaa.
- Meeqqat inuusuttullu atugaat ukiut kingulliit annertuumik misissuiffigineqarput. Paaqqinnittarfiit sammineqarput taamatullu angajoqqaarsianngortartut. Misissuisarnerni erseqqissumik siunnersuutinik saqqummiussisoqarnikuuvoq qanoq pitsaanerusumik sullissisoqarsinnaanersoq tamakkulu politikkeritut tusaaniarnerusariaqarpagut. Suliassaqarfimmi tassani suliniutit nutaat aallartereersut saniatigut soorlu naartusunut siusissukkut iliuuseqartarneq, inuusuttut perornerminni isumalluutigineqarsinnaanerat qulakkiissavarput, Olga P. Berthelsen isumaqarpoq.
Danmarkimut inissiisariaqartarnermi tunngaviusut ilagaat inuusuttut naalasseriitsut ilinniarsimasunit passunnissaqaannginnerat. Paaqqinnittarfimmi pisortap oqaatigaa aningaasarsiat apeqqutaalluinnartut taamalu siunnersuutigalugu perorsaasut ulloq unnuarlu paaqqinnittarfinni sulisut suliamut naapertuunnerusunik akissarsiaqalertariaqartut. Tamannali perorsaasut kattuffianni siulittaasup Kaaliina Skiftep tapersinngilaa.
- Politikkerisut akuliuffiginianngilara kikkut akissaataat qaffanneqartariaqartut aamma tamanna suliassarinngilara. Taamaattoq oqaatigisariaqarpara ilaasortat sinnerlugit isumaqatigiinniussinissamullu Kaaliina Skiftep isummersornera paasiuminaatsikkakku. Kattuffiup suulluunniit siulittaasuata anguniartussaavaa ilaasortat annertunerpaamik akissarsiaasa qaffannissaat. Ilaasortat soqutigisaat kisimik tunngavigineqartussaapput, taamaammat paasiuminaatsippara sooq Kaaliina Skifte taamatut isummersornersoq, Olga P. Berthelsen oqarpoq.
