Inuusuttut oqaatsit pillugit oqalliseqataarusupput

Kalaallit oqaasii pillugit oqallinnermi inuusuttut peqataatinneqartannginnerat naqqissuinnarneqartarnerallu ilinniartut akornanni naammagineqanngilaq.

Ilinniartut ilaat Hans Henrik Poulsen kalaallit oqaasiinik immikkut sammisaqarnini pillugu ima oqarpoq:

- Ullutsinni inuusuttut qallunaatut oqaluttorujussuupput. Taamaattumik utoqqaat oqartarput oqaatsigut inuusuttunit tammartikkiartuaarneqartut, qallunaatut tuluttullu akoorisaramik.

Politikerit, ilinniartitsisut, inersimasut utoqqaallu inuusuttut oqaatsinik atuinerannik naqqissuinerminni qanoq iliorsinnaanersut Oqaasileriiffiup aqutsisuata Carl Christian Olsenip ima siunnersuuteqarfigaa:

- Inussiarnersumik, ilitsersuinerusumik minnerunngitsumillu nikassaanngitsumik naqqissuisarnissaq inuusuttut kissaatigaat. Isumaqarpungalu tamanna pingaartuusoq, Carl Cristian Olsen oqarpoq.

Atuakkiortoq Hans Anthon Lynge isumaqarpoq kalaallisut oqaatsit ulorianartorsiunngitsut.

- Kalaallisut oqaatsivut ulorianartorsiunngillat, meeqqat alliartorneranni oqaatsit allanngoriartortarput. Meeqqat immikkukanneq oqaaseqarput, inuusuttut immikkukanneq oqaaseqarput aamma inersimasut. Inuusuttut ilaatigut oqalukkaangata inersimasut paasineq ajorpaat, peqqutigalugu inuusuttut paasisinnaasatik aallaavigalugit oqaatsinik ineriartortitsisarmata.

Kalaallit oqaasii ulorianartorsiortutut qangalili oqaatiginiarneqartartoq Hans Anthon Lyngep eqqaasissutigaa:

- 1700-ikkunnili oqaatigineqartalerpoq kalaallit oqaasii ulorianartorsiortut.

Qeqqani Ilinniarnertuunngorniarfimmi ilinniartut sapaatip akunnerani matumani sisamanngorneq ilanngullugu unnukkut arfineq-marluniit, ilaatigut Katuami tamanut ammasumik aaqqissuussisarniarput.