Inuusuttut kommunip ataatsimiittarfianiittut
Qulequttat meeqqat inuusuttullu avatangiisii, ataatsimoorfiit pitsaasut, inuusuttut akornanni pinerluuteqartarneq sunngiffimmilu inuuneq inuusuttut kommunalbestyrelsiisa oqaluuserisassaannut ilaapput.
Kommunip ataatsimiittarfianni isersimasut atuartunit eqimattanit taarserneqarput, suliassarli pisarnertulli iinnarpoq.
Inuusuttut kommunalbestyrelsianni angajullersaasup, Karl S. Rosagerip ulluni sisamani ataatsimiinnissaq ammarpaa. Pimmatiginnittoqartarneralu inuusuttut sammisassaanni immikkut pingaaruteqarpoq.
- Pimmatiginnittoqartarneranik annikillisaasinnaanissarput pissutigalugu ataatsimiinnerusarnissarput neriuutigaarput. Uani sammingaatsiarparput, 14-inik ukiulik Karl S. Rosager Nuummeersoq oqarpoq.
Ataatsimiinnerni Kommuneqarfik Sermersuup atuarfeqarfiini 7.-, 8.- aamma 9. Klassini atuartut meeqqanut inuusuttunullu tunngatillugu isumassarsitsialaqarput.
Ataatsimiinneq siulleq
Inuusuttut tunniusimalluinnartut 23-usut ataatsimiipput najukkaminnilu politikkikkut sammisat oqaluusereqatigiissutigalugit.
- Aalajangiisinnaatitaalluni ilungersuussassamillu tusaaneqarluni misilillugu nuannerpoq, Karl S. Rosager oqarpoq, nangillunilu:
- Qinerneqarsimasut tamarmik tunniusimalluartut malugineqarsinnaalluarpoq. Tamanna nuannerpoq.
Ataatsimiinnermi matumani ikinngutigiinnermik nutaamik pilersitsinissaq eqimattamilu ataatsimoorluarnissaq aamma sammineqarput.
Suli sapiissuseqarneq
Isumassarsiat tamarmik katersorneqarput borgmesterimullu ullumi ingerlateqqinneqarlutik, taakku maanna immikkoortiterneqassapput, inersimasullu kommunalbestyrelsiinit oqaluuserineqarlutik.
- Siunnersuutaat piffissap ilaani politikkikkut aalajangiiffigisassagut qilanaaraakka, borgmesteri, Avaaraq Olsen (IA) oqarpoq.
Kommunalbestyrelsip meeqqanik inuusuttunillu suliaqarnerminni ilanngutititserusunnerat pissutigalugu inuusuttut kommunalbestyrelsiat pilersinneqarnikuuvoq. Tamannalu arlalinnik pitsaasunik nassataqarumaartoq borgmesterip neriuutigaa.
- Siullermik inuusuttut kommunalbestyrelsianni ilaasortat pissarsiaqarnissaat ilikkagaqarnissaallu neriuutigaara. Aamma nuannersisitsillutillu siunissami uani suliaqaannarusunnissaat neriuutiginarpoq, borgmesteri oqarpoq.
Inuusuttut kommunalbestyrelsianni angajullersaasup siunissami politikkikkut suliaqarnissaq immaqa nuannerunartilereerpaa.
- Imaassinnaasoq politikerinngortunga. Kisianni qanoq ittarnera takullugu nuannerpoq, Karl S. Rosager oqarpoq.
Tusarneqarnissaq neriuutigigaa
Karl S. Rosagerimulli allamik siullertut pingaarnerusoqarpoq:
- Neriuppunga siunnersuutit nassiussagut tusarneqassasut, piviusunngortinneqarsinnaassasullu. Tamatuma takunissaa pissangagaara, taanna oqarpoq.
Kommuneqarfik Sermersuumi inuussuttut kommunalsbestyrelsiat kommunimi atuarfeqarfinnit tamanit ataatsimik marlunniilluunniit ilaasortaqarpoq, ukiullu marlukkaarlugit qinersisoqartarpoq – kingullermik 2023-mi qinersisoqarpoq.
Taamaammat Ittoqqortoormiinit, Nuummit, Paamiunit, Tasiilamit nunaqarfiiniillu ilaasortaqarpoq.
