Inuusuttut inatsisartui februar 2013-mi ataatsimiissapput
Tullianik inuusuttut inatsisartui ataatsimiilerpata qulequtarineqassaaq ”Oqaatsit – Oqaatsitigut piginnaasassavut eqqarsaatigalugit pingaartitavut anguniakkanut naapertuuppat?”. Meeqqat atuarfiinni 9. aamma 10. klassemi atuartut tamanna isummersorfigissavaat inuusuttut inatsisartuini februarip 22-aniit 24-ianut inatsisartut Nuummi ataatsimiittarfianni katersuutilerunik.
- Kalaallit Nunaannut pingaartorujussuuvoq inuusuttut demokrati atorlugu inuiaqatigiinni pissutsit pillugit aalajangertarnerni malinnaallutillu peqataanissaat. Taamaattumi inuusuttut inatsisartoqartarput. Ukiormannalu allaanerulaartumik aaqqissuivugut ulluinnarni atukkaminnut attuumassuteqartunik oqaluuserisaqartissagatsigit. Nalunaarneq internet mobilinilu smartphones-inilu apps-it atorlugit pissaaq taamaasillutik nunatsinni inuusuttut ulluinnarni sakkutik atorlugit peqataaniassammata, Inatsisartut siulittaasuat Josef Motzfeldt KNR.gl-mut oqarpoq.
Nunami maani kalaallit oqaasii salliupput aammali qallunaat tuluillu oqaasii inuusuttut ilinniagaqarnerminni atortussaavaat. Atuakkat oqaatsini tamani pissarsiassaapput, taamaammat oqatsit inuusuttut inatsisartui pingaarnertut sammineqassapput.
- Tusarusupparput nunami maani oqaatsini atuinerput pillugu inuusuttut qanoq isummersornersut. Ukiualuit matuma siorna Islandimiut præsidentiat peqatigalugu ataatsimiinnerni peqatavunga inuusuttut Islandimeersut Savalimmiuneersullu isummersortut oqaatsit sorliit atorlugit attaveqatigiinneq ingerlakkusunnerlugu. Taakku qallunaat oqaasii toqqarpaat uangalu assut pissanngatigaara oqaatsit sorliit atorlugit kalaallit inuusuttaat attaveqarusunnersut. Neriuppunga aamma inuusuttut inatsisartoqarnissaat inuusuttunit ilassilluarneqarumaartoq aammalu februarimi ataatsimiinnertik pissarsiffigilluarumaaraat, Josef Motzfeldt oqarpoq.
Inuusuttut inatsisartui uani paasisaqarfigisinnaavatit: http://www.inu.gl/
qaaqqusissut linkimi ataani aamma atuarsinnaavat.