Inuusuttut aalakkullutillu ikiarruppallaarput

Meeqqat atuarfiini atuartut akornanni imigassatortarneq pujortartarnerlu ukiuni kingullerni ilorraap tungaanut ingerlanngilaq. Aamma ikiaroornartumik hashitortarneq naamaartarnerlu eqqarsaatigigaanni peqqinnissamut oqartussat anguniagaat angoqqajarneqanngillat.

Meeqqat atuartut akornanni peqqissutsimik misissuinermi, saqqummiunneqaqqajaasumi, inerniliussat taamaapput.

Meeqqat inuusuttullu aangajaarniutinik atuinerat eqqarsaatigigaanni, ineriartornissamik aallussinissaq, innuttaasut peqqissuunissaannik suliniutip Inuunerittap suli iluatsissimanngilaa. Tassalu inuussuttuaqqat cigaritsinik pujortartarnerat, ikiaroornartumik hashimik imigassamillu atuinerat tanngassimaarutigissaanngillat.

Innutaasut peqqissuunissaannik 2010-mi  misissuinermi HBSC Greenlandimik taaguuteqartumi nunatsinni meeqqat atuarfiini atuartut peqqissusiat misissuiffigineqarpoq, ukiut 2006-imit 2010ip tungaanut ineriartorneq misissuiffigineqarluni.

Inuusuttuaqqat aqqanilinnit 16-it tikillugit ukiullit piffissami 2006-imit 2010-ip tungaanut aalakoornartunik misiliisimasut amerleriarsimaspput. Aamma meeqqat pingasoriarlutik amerlanerusoriarlutilluunniit imigassartorsimasut 2010-mi malunnartumik amerlanerupput.

Aamma ikiaroornartumik hashimik atuineq misissoraanni pitsaanerungaanngilaq. Inuusuttut 15-niit 17-inut ukiullit 19 procentii 2010-mi  ikiaroornartumik hashimik misiliisimapput.

Inuusuttut 15-niit 17-nut ukiullit hashimik atuisut 2010-mi 25 procentinit 19 procentinut appariarsimagaluartut, ikileriaat Inuunerittap anguniaagaanut suli ungasippoq. Tassalu inuusuttut hashimik atuisut inuusuttut tamarmik 10 procentiisa ataaniilernissaannik anguniagaasoq anguniassallugu sapernartoq nalunaarusiami oqaatigineqarpoq.

Naamaartarnerup annikillisinneqarnissaanut suliniut iluatsittutut oqaatigineqarsinnaanngitsoq nalunarusiami aamma erserpoq.

Naamaartarnerup sapinngisamik unitsivinneqarnissaa suliniuteqarnermi  anguniagaavoq.

Inuusuttut 16-nik ukiullit  2010-mi 25 procentii naamaarnermik misiliisimasut nalunaarummi atuarneqarsinnaavoq.

2006-imi inuusuttut 14 procentii naamaarnermik misiliisimallutik.
Inuusuttut, inuusuttuaqqat meeqqallu akornanni pujortartartut amerligaluttuinnarput.

Meeqqat inuusuttuaqqallu aqqanilinniit 16-it tikillugit ukiullit akornanni pujortarnermik misiliisimasut amerlerialaarsimapput, meeqqallu angajulliit affai ullut tamaasa pujortartarput, tassalu ukiuni 2006-imi aamma 2010-mi misissuinermit paasisat aallaavigalugit.

Aanngajaarniutinik atuinerup ulorianaataanik inuusuttut qanoq paasinnittarnersut aamma misissuineqarpoq.

Ikiaroornartumik hashimik atuineq naammaartarnerillu akulikitsunik atoraanni  ajortumik kinguneqarsinnaaneranik apeqqut pillugu inusuttut 16 aamma 20 procentii isumaqarput ulorianartumik kinguneqarsinnaanngitsoq.

Nalunaarusiaq nittartakkami peqqik.gl-mi sapaatip akunnerata matuma ingerlanerani atuarneqarsinnaalissasoq, misissuitsinermi akisussaasoq nakorsaq Birgit Niclasen oqarpoq.

Inuusuttut ikiaroornartumik hashimik atuinerat pillugu oqallinneq KNR radiomi aqagu ullaap tungaani quliniit aqqarngup tungaanut aallakaatinneqassaaq. Oqallinnermi aallakaatitsivimmiissapput peqqissutsimut Naalakkersuisoq Agathe Fontain aamma imigassaq ikiaroornartorlu pillugit siunnersuisoqatigiinni siulittaasoq Inuk Bourip Nielsen.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat