Inuusuttup toqutsisimasutut pineqaatissinneqartup pineqaatissiissutaa qaammatinik 20-nik sivikillineqarpoq
Toqutsisimasut eqqartuunneqarsimasup pillaatissiissutini Nunatta Eqqartuussisuuneqarfiani ukiumik ataatsimik qaammatinillu arfineq-pingasunik annikinnerulersippaa.
KNR-ip toqutsinermut suliaq eqqumiitsoq allaaseraa, tassanilu assigiinngitsut pingasut tassa, illersuisup, unnerluussisussaatitaasup eqqartuussisullu angutip ukiui maluginiarsimanngikkaa kukkusumik allapparput.
Eqqartuunneqartoq qanoq pineqaatissinneqassanersoq eqqartuussivimmi aalajangerneqaraangat piffissami toqutsiffiusumi ukiut apeqqutaasorujussuusinnaapput.
Suliami illersuisup sullitami ukiui Eqqartuussivimmi apeqqutigisimagai eqqartuussiviulli eqqartuussutip nalunaarutiginerani ukiui annikillisaanissamut tunngavigisimanngikkai paasissutissat nutaat takutippaat.
Suliami pineqartoq tassaavoq angutip MP-p ullumikkut 20-t sinnerlugit ukiullip Tasiilami Amitsivartimmi juulimi 2013-imi toqutsinera. MP-p arnaq niaquatigut sermiminermik anaavaa, taamalisinnarlunilu sissap killinganut kalillugu, tassanilu arnap timaa toqungasoq niaqua ilanngullugu immamut morsutsissinnarlugu qimaannarpaa.
Kinali toqutsisuunersoq politiinit 2013-imi paasineqanngitsoorpoq. Aatsaallu ukiut arlallit qaangiummata takunnittut marluk politiinut saaffiginnipput kinalu toqutsisuusinnaanera oqaatigalugu. Tassa MP takunnittunit marlunnit toqutsisutut oqaatigineqarpoq.
MP ujajaasimasutut ikiaroornartulerisimasutullu politiinit Jyllandip avannaani illoqarfimmi Hjørringimi 2016-imi tigusarineqarami 2013-imi toqutsineq pillugu apersorneqarpoq.
Paasissutissat takkunnittut politiinut saqqummiussaat angutip ilumoornerarpai. Kingornalu arnamik 2013-imi aasakkut sissamut qimaannakkaminik toqutsisimasutut unnerluutigineqarluni eqqartuunneqarpoq.
Suliaq Nunatta Eqqartuussisuuneqarfiani suliassanngorteqqitatut sisamanngormat suliarineqarpoq. Eqqartuussiviup toqutsisutut pineqaatissinneqarsimasup, MP-p ukiuni arfilinilli qaammatinilu arfineq-pingasunik pineqaatissiissutaa annikillisinneqassanersoq aalajangiiffigisussaavaa.
Illersuisup unnerluussisussaatitaasullu MP pinerlunnermi nalaani 18-it inorlugit ukioqarmat pineqaatissiissut ukiunut tallimanut appartinneqassasoq tunngavilersorpaat.
Illersuisuttaaq eqqartuussivimmi piumasaqaatigaa sullitani toqutsisutut eqqartuunneqassappat ukiuni tallimani pineqaatissinneqarnissaa piumasarisimavaa.
Nunatta Eqqartuussisuuneqarfiata illuatungeriit taperserpai taamaalilluni MP-mut pineqaatissiissut Eqqartuussiviup ukioq manna januaarimi aalajangiinera ukiumik ataatsimik qaammatinillu arfineq-pingasunik sivikillillugu.
Paasissutissat nutaat
MP-p illersuisuata sullitani toqutsinerup nalaani qassinik ukioqarsimanersoq apeqqutigisimagaa sisamanngornermi eqqartuussinermi saqqummiunneqarpoq, tassanilu MP 17-inik qaammatinillu aqqanilinnik ukioqarnerarpoq.
Eqqartuussiviulli eqqartuussut januaarimi aalajangermagu tamatuma annikillisaataasinnaanera tunngaviginngilaa.
Tulliuttumilli eqqartuussut unnerluusisussaatitaasuni suliareqqitassanngorneqarpoq, taakkulu MP-p ukiui eqqartuussisut suliaasa allassimaffianni allassimanngitsut paasivaat.
Taamaammat unnerluussisussaatitaasut suliaq Nunatta Eqqartuussisuuneqarfiani MP-p toqutsinermi nalaani 18-iliineqarsimannginnera eqqartuussummut annikillisaataasussaasutut tunngavissaqarnera naliliiffigineqartussanngorlugu suliassanngorteqqippaat.
Nunatta Eqqartuussisuuneqarfiani unnerluussisussaatitaasup Michael Bo Hansenip eqqartuussivimmi eqqartuussut annikillineqarnissaa tunngavilersorpaa. Illersuisup unnerluussisussaatitaasullu eqqartuunneqartoq ukiuni tallimani pineqaatissinneqarsimasunut inissiisarfimmiinnissaa tunngavilersorpaat, tamannalu eqqartuussiviup isumaqatigaa.
Taamaalilluni Eqqartuussiviup januaarimi aalajangigaanit MP-imut pineqaatissiissut qaammatinik 20-nik ilanngarneqarpoq. MP maanna Tasiilami pineqaatissinneqarsimasunut inissiisarfimmiippoq.
KNR-ip ilanngutassiami siullermi suliami illersuisup sullitami ukiui maluginiarsimanngikkai allanneqarpoq. Tamanna eqqunngilaq. Kukkuneq ajuusaarutigaarput.
