Inuusuttuaqqat Qaqortumi biilinik aallarussuipput

Inuusuttuaqqat 13-iinnarnik ukiullit biilinik tillinniartalerput Qaqortumilu unnuami angalaartarlutik - imminnut allanullu ulorianartorsiortitsillutik. Inuusuttuaqqat Qaqortormiuunngillat isumaginninnermili paaqqinnittarfimmit Akillerneersuullutik tassanngalu qimaariarlutik biilinik tillittartut.
marsip 08-at 2010 10:09

Aallarussuisunik politiit sisamariarlutik ulluni kingullerni 14-ini naammattuuisarsimapput. Biilinik tillitaminnik ingerlatsinermut allagartaqanngikkaluarlutik ingerlatsisuusarsimapput inuusuttuaqqat 13-iniit 15-inut ukiullit ulloq unnuarlu angerlarsimaffimmiit Akillerneersuut.

- Manna tikillugu suli inunnik ajoqusertoqanngilaq, apeqqutaaginnarlunili tamanna qaqugu pissanersoq, Qaqortumi vicepolitikommissær Stine Egede Nørbæk mianersoqqusivoq:

- Umiarsualivimmummi ingerlaannarsinnaammata tamaanilu aqquserngup sinaa assiaqutarani. Aamma sukkaniuttarsimasut tusaamavavut, Stine Egede Nørbæk oqarpoq.

Biilit tillinniarnernit ajoquserneqarneq ajorput. Biilit matuersaataat arlaatigut iliornikkut inuusuttuaqqanit pissarsiarineqartarsimapput biilillu atorneri naammaleraangata inaannut inisseqqinneqartarlutik.

Qaqortumi politiit erseqqissarpaat matumani Akilliit isornartorsiorneqanngimmata. Innuttaasulli kajumissaarneqarput inuusuttuaqqanik unnuami biilertunik takusaqaraangamik politiinut attaveqartaqqullugit.

Inuusuttuaqqat 15-it inorlugit ukiullit pineqaatissinneqarsinnaanngillat, taamaattumik suliassat, killisiuisoqareernerata kingornagut, kommunimi, inuusuttuaqqat kingoqqiffianni, inunnik isumaginninnermi ingerlatsivimmut ingerlatinneqartarlutik.

Akillernit oqaaseqartitsisoqarsinnaasimanngilaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq