Inuusuttoq umiatsiaararsortoq: Umiatsiaararsortunngortussat aamma eqqorneqarput

Grønlandsbanki umiatsiaararsortunut aningaasaliisarunnaarpoq. Tamanna umiatsiaararsornermik inuussutissarsiuteqalersussanut tullernut eqquissaaq, taama inuusuttoq umiatsiaararsortoq aamma politikkimik aallussaqartoq, Ilatsiaq Markussen, isumaqarpoq.
Umiatsiaararsorlutik aalisartut bankimik tunuliaquteqarnissartik pisariaqartippaat. Taama Ilatsiaq Markussen isumaqarpoq. Assi © : KNR
oktobarip 24-at 2019 06:58

Grønlandsbankip umiatsiaaqqanut nutaanut atortunullu aningaasanik atukkiisarnerminik unitsinnera inuusuttumut Nuummi umiatsiaararsorluni inuussutissarsiuteqartumut kamaammertitsivoq.

- Aalisartut allaat oqariartorfigineqarput nunamut qaqiinnartariaqarnissaannik, Ilatsiaq Markussen oqarpoq.

Taanna Siumup Inuusuttaasa suliniaqatigiiffiata aalisarnermut ataatsimiititaliaani ilaasortaallunilu umiatsiaararsorluni aalisartuuvoq.

Grønlandsbankip atukkiisarunnaarnera umiatsiaararsorluni aalisarnermi aningaasatigut piujuaannartitsinissarlu siunertaralugu imminnut nammassinnaajunnaavissimaneranik tunngaveqartinneqarpoq.

AAMMA ATUARUK Grønlandsbanken umiatsiaraasortunut aningaasaliisarunnaartoq

- Aalisartoq motoriiaruni massakkut Grønlandsbanki motoritaarnissaminut isumalluutigisinnaajunnaarpaa. Taamaalilluni aningaarsiornermi ingerlateqqinnissaanut periarfissaaruppoq, Ilatsiaq Markussen oqarpoq.

Taannami naapertorlugu umiatsiaararsorlutik aalisartut atortuminnik aserortooraluarunik bankimik tunuliaquteqarnissartik pisariaqartippaat. Aalisartummi aalisarnermit isertitsinnginnerminni aningaasartuuteqartuartuupput.

- Aamma aningaasartuuteqareeraluarluni nalusuaannarpaa aalisartup qaqagukkut qanoq iluanaaruteqassanerluni. Taamaattumik aningaaserivimmik isumalluuteqartuarnissaq kialuunniit aalisartup pisariaqartippaa, Ilatsiaq Markussen oqarpoq.

AAMMA ATUARUK Grønlandsbanken umiatsiaararsortunut taarsigassarsititsisarunnaartoq – Bank Nordik suli ammatitsivoq

Ilatsiaq Markussen oqaluttuarpoq umiatsiaq nutaaq isumannaatsorlu, atortussai ilanngullugit, ullumikkut 400.000 koruunit pallillugit akeqartoq. Taamaattumik bankip atukkiisarnerminik unitsitsinera aalisartunut inuusuttunut, aalisartunngorumaartunullu, kinguneqarumaartoq Ilatsiaq Markussen isumaqarpoq.

- Aalisartunngortussat nutaat tullii umiatsiartaarsinnaajunnaarput Grønlandsbanki aqqutigalugu, Ilatsiaq Markussen oqarpoq, nangillunilu:

- Taanna umiatsiaararsortunut tamanut, saarullinnianut aamma, eqquinerluppoq. Tamannalu aalisartunuinnaanngitsoq ernumanartumik sunniuppoq. Inuiaqatigiinnut tamanut sunniuppoq. Aalisartunut ilaqutaasunut tamanut sunniuppoq.