Inuusuttoq Nakuusami suleqataasoq: Isumaginninnermut innersuussutit pingaarnerit ukuupput
Meeqqat unnuakkut ornittagassaat, atornerluisunut katsorsaanerit pitsaanerusut sakkortunermillu pineqaatissiisarneq.
Meeqqat inuusuttullu atugarliortut pitsanngorsaaviginiarlugit Naalakkersuisut qallunaat naalakkersuisui suleqatigalugit inassutaannut Leo Pedersen Jørgensenip pingaarnerutitai taakkuupput.
Taanna Nakuusap meeqqanut isummersortarfiani ukiut kingulliit sisamat ilaasortaavoq.
AAMMA ATUARUK Ataatsimut isigalugu: Meeqqanut inuusuttunullu atugarliortunut atatillugu innersuussutit 16-it
Inuusuttut unnuami ornittagaqarnissaat taassuma assut pingaartippaa.
Nunatsinni nalunaarutigineqartut arfineq pingasoriaammik amerlanerusut
- Nunatsinni kinguaassiuutitigut atornerluinerit politiinut nalunaarutigineqartut Danmarkimut Savalimmiunullu sanilliullugit arfineq pingasoriaammik amerlanerupput.
- Nunatsinni meeqqanut inuusuttuaqqanullu kinguaassiuutitigut atornerluinerit nalunaarutigineqartut Tasiilami amerlanerpaapput.
- Meeqqanut 15-it inorlugit ukiulinnut kinguaassiuutitigut atoqateqarnerit 2018-imi nalunaarutigineqartut 27 procentii Tasiilamiipput, Tasiilamilu innuttaasut nunatsinni innuttaasut ataatsimut amerlassusaasa 5 procenteralugit.
Tusarfik: Kalaallit Nunaanni Politiit
- Matunerisa kingorna susassaarullutik misileraanerit inupiluusernerit takkussinnaasarput. Unnuakkut ammasartumik pilersitsigaluarunik tamakku inupiluuserniakujunnerit misileraanerit ikilisarneqarsinnaagamik. Nutaamik ammaagaluarunik unnuakkut ornittakkamik iluaqutaassagaluarpoq, Leo Pedersen Jørgensen oqarpoq.
Inassutit 16-it suliarineqarnikuupput. Nalunaarusiaq 67-inik quppernilik isumaginninnermut naalakkersuisup Martha Abelsenip sapaatit akunnerata siuliani saqqummiuppai. Nunatsinni meeqqat inuusuttullu atugarliortut iliuuseqarfiginiarlugit Martha Abelsen Astrid Kragilu suleqatigiissutiginissaat siorna oktobarip qaammataani atsioqatigiissutigaat.
Isumaginninnermut oqartussaaffik Kalaallit Nunaannit ukiuni 41-ni kingullerni akisussaaffigineqarpoq. Piviusulersaarut "Byen hvor børn forsvinder", kalaallisuunngorlugu illoqarfimmi meeqqat peeruffianni, Tasiilami meeqqat inuusuttullu atugarliornerinut tunngasoq siorna saqqummerpoq: Najugaqartut tallimaagaangata ataaseq imminut toqulluni peeruttartoq, meeqqallu marluugaangata aappa kommunip isumaginnittoqarfianit sullinneqartartoq.
AAMMA ATUARUK Martha Abelsen sumiginnaaneq atornerluinerlu pillugit: Maannakkut assoruussaagut
Piviusulersaarut saqqummereerneranit Inatsisartuni iliuuseqaqqusilluni oqallinneq aallartippoq - oqallinneq Naalakkersuisut danskit naalagaaffiannut meeqqanut kinguaassiutitigut atornerluisoqartarnera sumiginnaasoqartarnerali iliuuseqarfiginiarlugu ikioqquneranik inerneqartoq.
Suliniutinut qallunaat naalakkersuisui 80 millionit koruuninik aningaasaliipput.
Pineqaatissiisarneq sakkortuneq
Inassutini Leo Pedersen Jørgensenip pingaarnerpaat tulliattut toqqagaa tassaavoq kinguaassiutitigut pinerluuteqarsimasunut atatillugu suliniuteqarnermik pilersitsineq.
- Ikiorneqartariaqarput. Inuttut qaffassarlugit qaqiteqqinniarsaralugit inuunermut ajunngitsumut ingerlateqqinniarsaralugit, taanna oqarpoq.
Taassuma saniatigut pineqaatissiisarneq sakkortusineqarnissaa taassuma pingaarnerit pingajuattut toqqarpaa. Taanna ima nipeqarpoq: Meeqqanut atoqatigiinnikkut pinngitsaaliinermi allatigullu kinguaassiutitigut atoqateqarnermut tunngatillugu suliani pineqaatissiissutissap annertussusaanik qaffaaneq.
AAMMA ATUARUK Astrid Krag isumaginninnermi suliniutit pillugit: Iliuutsivut naammassimanngillat
- Nunatsinni pineqaatissinneqarneq annikippallaarujussuarpoq massakkut. Taava sanilliutissagaanni atornerluisumut, assersuutigiinnarlugu ukioq ataaseq qaammatillu arfineq-marluinnaat pineqaatissinneqaratpoq.
- Pineqaatissinneqarnera qaangiuppat pineqaatissinneqartumut pisoq qaangiutissaaq. Meerarlu inuunermi sinnera anniaatissinneqarluni, Leo Pedersen Jørgensen oqarpoq.
Isumaginninnermut oqartussaaffik nunatta 1979-imili akisussaaffigilermagu susassaqarfimmi kalaallit qallunaallu qanimut aatsaat taama suleqatigiittoqartigaaq.
00:04:39
Nalunaarusiaq uani atuarsinnaavat.
