Inuussutissalerinermut Oqartussaaffik mianersoqqussuteqarpoq: Raajat containerimut iginneqarsimasut nerinagit

- Raajat igitat nerineqassanngillat.

Nunatsinni Uumasunut Nakorsaqarfik Inuussutissalerinermullu Oqartussaaffik taama oqarpoq.

Raajanik akikitsunik Ilulissani Facebook aqqutigalugu ulluni kingullerni tuniniaasoqarnerata kingunerisaanik taama mianersoqqussuteqarpoq.

Raajalli Royal Greenlandip Ilulissani eqqaavianit containeriusumeersuupput, taamaammallu nerineqassanngillat.

Inuussutissalerinermut oqartussaaffik Royal Greenlandip oqartussanut saaffiginnissuteqarneratigut taama nalunaaruteqarluni, tusagassiuutinut nalunaarummi allappoq.

-  Royal Greenlandip nalunaarutaa matumuuna mianersoqqutigalugu ingerlateqqippaa raajat kasiilerneqarsimasut pisiarineqaratillu nerineqassanngitsut, oqartussaaffik allappoq.

Tuniniaqqinneqaqqusaanngitsut

Inuussutissanik ’ajortunnguussimanerannik imaluunniit inunnit nerineqarsinnaannginnerannut arlaatigut takuttutissaqartut’ tuniniarneqaqqinnissaat inerteqqutaasoq, Inuussutissalerinermut Oqartussaaffimmik tusagassiuutinut nalunaarummi allassimavoq.

Tamannalu raajanut kasiilerneqarsimasunut atuuttoq, inuussutissalerinermut oqartussaaffik allappoq.

Raajat ullussaat qaangiussimammata iginneqarsimasut Royal Greenlandip KNR-imut sapaatip akunnerani siusinnerusukkut paasissutissiissutigaa. Taamaammat raajat nerineqassanngitsut pingasunngormalli kaammattuutigilerpaat.

Taamaakkaluartorli raajat containerinit paarnaarneqanngitsunut iginneqarsimasut tiguneqarsimapput – tamatumalu kingorna Facebook aqqutigalugu allanut tuniniarneqaqqillutik.

Royal Greenlandip attaveqaqatigiinnermut sulisoqarnermullu pisortaata Bodil Marie Damgaardip raajat containerinut parnaarsinnaasunut iginneqarsimasussaagaluartut nassuerutigaa.

Politiit utaqqimaartut

KNR har kontaktet politiet for at høre, hvordan de forholder sig, og vagtchef Jørgen Madsen fortæller, at man ’afventer’.

- Ilulissani innuttaasunit saaffigineqanngilagut, taamaammat utaqqimaarpugut. Nalunaarutiginnittoqassappat tassanga suliaqassaagut, Kalaallit Nunaanni Politiit pigaartuisa pisortaat, Jørgen Madsen paasissutissiivoq.

- Royal Grenlandip containeriminit tillittoqarnera nalunaarutiginiaruniuk tillittoqarsimasinnaaneranik nalunaaruteqartoqarnissaa utaqqimaarparput, taanna oqarpoq.