Adolfine raajanik akikitsunik pisivoq – taakkuli containerimeersut paasinarsivoq
Raajat 800 kiilu Facebookikkut quppernermi Ilulissani allagarsiivikkut sapaatip akunnerani siusinnerusukkut tuniniarneqarput.
5 kiilu 150-ip 250 koruunillu akornanni akeqartinneqarput.
Raajalli nerineqassanngitsut, Royal Greenland oqarpoq. Raajat Royal Greenlandimit iginneqaqqammersuunerat pissutaavoq. Taakkulu tamatuma kingorna inuinnarnit tillinneqarlutillu tuniniaqqinneqarput.
Raajat nerineqannginnissaannik Royal Greenlandip kaammattuuteqannginnerani karsit siulliit tunineqareersimapput.
Adolfine Jonathansen Ilulissaneersoq pisisut ilagaat, taassuma 10 kiilu pisiarai.
- Illoqarfimmi ajornakusuulaaramik raajat pisiniarfimmi. Taava tuniniaasut takullugit iluatigalutigit pisigatta.
Eqqaavimmeernerat takorloorsinnaanngikkai
Adolfine Jonathansenip pisiani suminngaanneersimanissai takorloorsimanngilaa.
- Aallaqqaammut eqqarsaatiginngilara pisiumagama. Kisianni kingorna kommentarertorpassuit pisiumasut eqqarsarlunga assaa ikak, pisiumasut tamarmik pisisimassappata ikattorparujunnik peqarsimassapput taakkua.
Amerlappullumi. Raajammi 800 kiilut Royal Greenlandip suliffeqarfissuata eqqaani eqqaavimmut containeriusumut iginneqarsimapput.
- Royalip containeri taanna eqqaavittut atortarpaa. Eqqaaviup ilua iluasaarani tutulluni taavalu oqarfigitillunga taakkua tigooraasut puut taakkua raajat qaavi tingooqqaramikkit tutussimassammata, Adolfine Jonathansen oqarpoq.
Raajat iginneqartut peqqissutsimut akornutaasinnaaneersut Royal Greenlandimit misissorneqanngillat.
- Pisoqaligaagamik qaangiuttooraangamik iginneqartarput, uagut nalilersinnaatitaanngilarput raajat ulorianaateqannginnersut nerillugit, kisianni kvalitet tungaatigut maleruagassagut tassunga naapertuutinngillat taakkua raajat, Royal Greenlandimi attaveqatigiinnermut sulisoqarnermullu pisortaq, Bodil Marie Damgaard, oqarpoq.
Ippinnartumik mamaqanngitsut
Taassumali suliffeqarfimmi sukannersumik maleruagassaqartoq erseqqissaatigaa, raajallu containerimut parnaaqqasussamut iginneqartussaagaluartut nassuerutigalugu.
Pisoq suliffeqarfiup eqqarsaatiginnilluartariaqarneranik kinguneqarpoq, taakkulu raajat nerineqannginnissaat erseqqissaatigaat.
Adolfine Jonathansenilli ilaqutaasalu raajat neriffigereerpaat. Taakkuli arlaannaalluunniit napparsimalinngilaq.
- Nerereeratsigit aqaguani iterama imaallunga raajatornikuugaluarlunga ajunngilanga arlaatigut malunnartoqanngilaq kisianni tassa igippakka, taanna oqarpoq.
