Inuunerup ataqqinartumik naanissaa politikkikkut piumasaraat

Inuit amerlanerujartuinnartut inuunermik hospicemik taaneqartartumi naggasernissaa toqqartarpaat. Tassani toqqissisimallutik nunami maani inuunertik naasarpaat.

Nunatsinni aamma inuit ilaqutaallu amerligaluttuinnartut kalerrinneqartarput katsorsarneqarsinnaanngitsumik napparsimalersimallutik. Katsorsarneqarsinnaanngitsumik napparsimasut ikinngitsut inuunertik napparsimmavimmi, utoqqaat illuanni imaluunnit sapertut inaanni inuunertik naasarpaat. Ataasiakkaat aamma namminneq angerlarsimaffimminni eqqissinissartik toqqartarpaat.

Maanna Doris Jakobsen Siumumeersoq aamma Atassummeersut Siverth K. Heilmann aamma Knud Kristiansen siunnersuuteqarput Nunatsinni hospice-mik pilersitsisoqassasoq.

- Atassummiit isumaqarpugut taamatut napparsimasunik toqujartortunullu napparsimmavimmik pilersitsinermi napparsimasut, ilaqutaasut pitsaanerusumik ataqqinassusilimmik, aammalu napparsimasumut toqqissisimanartumik avatangiiseqartitsineq ulloq unnuarlu paaqqutarineqarnikkut pilersitsiffiussasoq, Siverth K. Heilmann aamma Knud Kristiansen siunnersuumminnik tunngavilersuipput.

Doris Jakobsenip Danmarkimi misilittagaareersut qimerluuataarsimavai ullumikkummi hospicet 17-it pioreermata. Taakku sapinngisamik naalliunnanngitsumik ataqqinassusilimmillu inuunerup naanissaanik isumaginniffiusarput.

Atassummeersut aamma Doris Jakobsenip siunnersuutigaat hospice aqqaneq marlunnik inissalik pilersinneqassasoq.

Tamanna oqaluuserineqartussat ilagaat Inatsisartut ukiaanerani katersorneranni tallimanngorneq septemberip 21-at aallartittussami.