Inuttut pisinnaatitaaffiit immikkut sammineqassapput
![](/sites/default/files/styles/image_934x467/public/article_images/mine_2.jpg?itok=CBIUaSce)
Inuttut pisinnaatitaaffiit pillugit Nunatsinni suliniarneq ilaatigut unammilligassaqarpoq.
Eqqartuussiveqarfinni suliassat utaqqisut amerlapput, nutserinermilu suliassat, soorlu eqqartuussinerni nutserisarnerit allagaatillu nutsigassat aamma unammillernartoqarlutik. Innarluutillit eqqartuussiveqarfinni sullinneqarnerat periarfissaallu aamma unammillernartoqarput.
Inuttut pisinnaatitaaffiit pillugit institutip Nunatsinni sulilernissaani ilaatigut tamakku suliassaapput.
Aatsitassalerinermi suliniutinut angisuunut atatillugu sulisut nunani allaneersut Nunatsinni sulilerpata taakku pisinnaatitaaffii, institutip immikkut aamma soqutigisarai.
Kalaallit Nunaanni inuttut pisinnaatitaaffiit pillugit siunnersuisoqatigiit ilisimasaat, Inuttut pisinnaatitaaffiit pillugit institutip ilisimasaanut ataqatigiissinneqarnissaat siunertaavoq:
- Instituti inuttut pisinnaatitaaffiit assigiinngitsut pillugit nalunaarusiortalissaaq, Kalaallit Nunaanni inuttut pisinnaatitaaffiit inissisimanerat pillugu nunanut tamalaanut nalunaarusiortalissaaq, oqartussalluunniit pisinnaatitaaffiit pillugit siunnersorneqartalernissaannut aamma periarfissaqalissaaq, tamannalu nuannaarutissaavoq, immikkut siunnersorti Lise Garkier Hendriksen oqarpoq.
Kalaallit Nunaanni inuttut pisinnaatitaaffiit pillugit sulineq maanna aaqqissugaanerulissasoq, taassuma oqaatigaa:
- Inuttut pisinnaatitaaffiit pitsaanerulissapput, tassami qanoq pisoqarnersoq annerusumik ilisimasaqarfigilissagatsigu, nunallu tamalaat akornanni pisinnaatitaaffinnut naleqqiullugu Kalaallit Nunaanni qanoq inissisimasoqarnersoq annerusumik ilisimasaqalerfigissagatsigu, Lise Garkier Hendriksen oqarpoq.