Inuit sisamat hashi 6 kilo pillugu unnerluutigineqartut

Angutit pingasut arnarlu ataaseq hashimik 6 kiilumik Danmarkimiit Nunatsinnut anngiortumik 2015-imi februaarimili ukioq manna septembarimut eqqussisimasutut tuniniaasimasutullu politiinit unnerluutigineqarput. Suliarlu Eqqartuussisoqarfik Sermersuumi ullumi ataasinngornermi aallartinneqassaaq.
ikiaroornartoq Politi stoffer
Assi © : KNR
Allattoq Anton Gundersen Lihn
decembarip 10-at 2018 08:00
Nutserisoq Mads Lynge

Suliaq Eqqartuussisoqarfik Sermersuumi ulluni tallimani suliarisassanngorlugu missingersorneqarpoq.

Unnerluussissutit pisimasunik 14-inik imaqartut, politiit unnerluussutaanni atuarneqarsinnaavoq. Unnerluutigineqartut sisamat hashimik Qaqortumi, Nanortalimmi, Paamiuni, Sisimiuni Aalborgimilu tigummiaqarlutilluunniit tuniniaasimasut aamma unnerluutigineqarpoq.

AAMMA ATUARUK Eqqartuunneqartut tamarmik suliareqqitassanngortitsisut

Haship anngiortumik eqqussorneqartup ilaata Royal Arctic Line aqqutigalugu Aalborgimit Nanortaliliaanneqarsimanissaa ilimagineqarpoq, unnerluutigineqartut ilaat Royal Arctic Linemi inuttaanermini hashimik anngiortumik eqqussisimasutut unnerluutigineqarluni.

Haship tuniniarneqarnerani 2,7 million koruunit missaanittoq iluanaarutaasimanissaa naatsorsuutigineqarpoq. Aningaasat ilaatigut umitsianik, biilinik elektronikkinillu pisinernut atorneqarsimasut unnerluussummi atuarneqarsinnaavoq.

AAMMA ATUARUK Hashimik anngiortumik eqqussisutut sivisuumik pineqaatissinneqartut

Pingaarnertut unnerluutigineqartoq imigassartorsimatilluni biilinik ingerlatsisimasutut pasineqartoq, unnerluussummi aamma takuneqarsinnaavoq, soorlu aamma biilersinnaanissamut allagartaqarani ingerlatsisimasutut pasineqartoq.

Hashimik anngiortumik eqqussisimasutut unnerluutigineqartut Eqqartuussisoqarfik Sermersuumi eqqartuunneqarnerat ullumi ataasinngornermi aallartissaaq.

AAMMA ATUARUK Hash pillugu inuit arlallit tigusarineqartut

Hashimik anngiortumik Nunatsinnut eqqussuisimasut pillugit eqqartuussivitsigut suliat annerit ilaat pineqaatissiinermik, qaammatit sisamat matuma siornatigut naammassineqarpoq.

Inuit arfineq-marluk ukiut marluk ingerlanerini hashimik 60 kiilumik Danmarkimit Nunatsinnut eqqussisimasutut pineqaatissinneqarput. Pineqaatissinneqartut tamarmik aalajangiineq suliareqqitassanngortippaat.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk