Eqqartuunneqartut tamarmik suliareqqitassanngortitsisut
Kalaallit Nunaata oqaluttuarisaanerani hashi pillugu eqqartuussivimmi suliat annersaasa ilaanni unnerluunneqartut arfineq marluusut tamarmik aggustip 6-ani pisuutinneqarlutik eqqartuunneqarput. Maannali suliaq eqqartuussivimmi suliareqqinneqartussanngorpoq, eqqartuunneqartummi arfineq marluk suliaq suliareqqitassanngorteqqikkamikku.
Taamaalilluni suliaq aallaqqaataaniit Nunatta Eqqartuussisuuneqarfiani suliarineqartussanngorpoq.
Sermersuup Eqqartuussiviani 29-nik ukiulik Timmy Owen Zeeb suliami sakkortunerpaamik pineqaatissineqarluni ikiaroornartunik anngiortumik eqqussisimasutut, nakuusersimasutut sioorasaarisimasutullu ukiuni tallimani qaammatinilu arfineq pingasuni pinerluuteqarsimasunut inissiisarfimmiittussanngortinneqarpoq.
Inunnguaq Nielsen, Minik Johnsen, Ilannguaq Kristiansen, Aputsiaq Tröndheim aamma Fabian Pedersen ukiuni tallimani pinerluuteqarsimasunut inissiisarfimmiittussanngortinneqarput, aningaasarpassuarnillu arsaarneqarlutik.
Angutit arfinillit hashimik 60 kiilumik Danmarkimit Nunatsinnut 2015-imit 2017-imut anngiortumik eqqussuisimasutut pineqaatissinneqarput.
Unnerluunneqartoq kingulleq 27-nik ukiulik, Mette Thomassen hashimik 30 kiilungajammik anngiortumik eqqussueqataasimasutut ukiuni pingasuni qaammatinilu qulingiluani pineqaatissinneqarsimasunut inissiisarfimmiittussanngortinneqarpoq.
Eqqartuunneqartut arfineq marluusut tamarmik suliaq Nunatta Eqqartuussisuuneqarfianut suliareqqitassanngortippaat, suliareqqitassanngortitsinerlu suli ullulerneqanngilaq.
