Assi: KNR

Hashimik anngiortumik eqqussisutut sivisuumik pineqaatissinneqartut

Hashi pillugu suliami nunatta oqaluttuarisaanerani annersat ilaanniittumi unnerluutigineqartut arfineq-marluk Eqqartuussisoqarfik Sermersuumit sivisuunik pineqaatissinneqarput.

Eqqartuussisoqarfik Sermersooq hashimik 63 kiilu missaanniittumik nunatsinnut eqqussinermut suliarujussuarmut ataasinngornermi eqqartuussivoq.

29-nik ukiullip Timmy Owen Zeebip hashimik anngiortumik eqqussisimasutut, nakuusersimasutut sioorasaarisimasutullu pineqaatissinneqarsimasunut ukiuni tallimani qaammatinilu arfineq-pingasuni inissiisarfimmiittussatut pineqaatissinneqarnera eqqartuussutini sakkortunerpaajuvoq. Aamma 4 millionit koruunit tassanngaanniit arsaarinnissutigineqarput.

AAMMA ATUARUK Tigummigallarneqartut ukioq ataaseq sinnerlugu tigummigallarneqartussaasut

Inunnguaq Nielsen, Minik Johnsen, Ilannguaq Kristiansen Aputsiaq Tröndheimilu pineqaatissinneqarsimasunut ukiuni tallimani inissiisarfimmiittussatut pineqaatissinneqarput, taakkunanngaanniillu aamma aningaasarpassuit arsaarinnissutigineqarput.

Angutit arfinillit hashimik 60 kilomit oqinnerunngitsunik aaqqissuussamik anngiortumik 2015-imit 2017-mut eqqussisimasutut pineqaatissinneqarput.

Unnerluutigineqartuni kingulleq, 27-nik ukiulik Mette Thomassen, hashimik 30 kiilungajammik eqqusseqataasimasutut pineqaatissinneqarsimasunut ukiuni pingasuni qaammatinilu qulingiluani inissiisarfimmiittussatut pineqaatissinneqarpoq.

Eqqartuussut akuerissanerlugu suliareqqitassanngortitsiniarnerlutilluunniit aalajangernissaminnut tamarmik ulluni 14-ini eqqarsarfissaqarusupput.

Unnerluussisussaatitaasoq naammaginnittoq

Nunatta politiivini unnerluussisussaatitaasuuneq Tobias Berg suliaq pillugu ima oqarpoq.

- Eqqartuussiviup unnerluussisussaatitaasunit piumasarineqartumik malitaqarnera, hashimillu anngiortumik eqqussisutut pineqaatissinneqarsimasunut sivisuumik inissiisarfimmiittussanngortitsinera naammagaara, soorlu aamma ilaatigut biilinik, umiatsianik qarasaasiatigullu pigisanik aningaasatut nalilinnik  arsaarinnittoqartoq, Tobias Berg oqarpoq.

AAMMA ATUARUK Aningaasanik nuussisarnerit eqqumiitsut hashi pillugu suliamik aallarniisuupput

Aaqqissuussamik pinerluttuliorsimanermut uppernarsaatissaqarnera eqqartuussiviup eqqartuussuteqarnerminut tunngavilersuutigaa.

Aningaasarpassuit maanna pineqaatissinneqarsimasut kontoinut ikineqartut suminngaanneernerisa nassuiaatigineqarsinnaasannginnerat eqqartuussisup Johanne Banke Thorupip tunngavilersuutigaa.

KNR-ip pineqaatissinneqarsimasunut illersuisut arlallit attaveqarfigai, oqaaseqarnissartilli maanna kissaatiginngilaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat