Inuttut pisinnaatitaaffiit misissorneqartut

Suli pitsanngorsaaffissaqaraluartoq, pissutsit ajortuinnaanngillat.

- Amerlanerit isumaaninngaanniit ajunnginnerusumik ingerlasoqarpoq, Inuit pisinnaatitaaffiini institutip pisortaa, Jonas Christoffersen taama oqarpoq.

Taanna siullerpaamik 2009-mi nunatsinniippoq, taamanikkullu inuppaaluit naapitani inuit pisinnaatitaaffiinik annerusumik ilisimasaqarpianngitsut naapissimavai.

- Kalaallit Nunaanni nunanut allanut sanilliukkaanni demokratii ingerlalluarpoq, Jonas Christoffersen oqarpoq.

Nunatsinni inuit pisinnaatitaaffii pillugit amerlanernit malinneqaraluartut, pitsanngorsaanissaq pisariaqarsimavoq.

Inuit pisinnaatitaaffii pillugit sammisat assigiinngitsut qulit matumani pineqarput, qanorlu malinneqarnersut Nunatta Inuit pisinnaatitaaffiinut siunnersuisoqatigiivi peqatigalugit misissuisimapput.  

- Sammisat ilaat ilisimaneqarluartut, tassaapput meeqqat inuusuttullu pisinnaatitaaffii, Kalaallit Nunaanilu meeqqat amerlasuut ajornartorsiuteqarput, tamannalu soorunami sammivarput, Jonas Christoffersen oqarpoq.

Eqqartuussinermi inatsisitigut isumannaatsuuneq, naligiissitaaneq inuillu pisinnaatitaaffii qanoq innuttaasut akornani ilisimasaqarneq siammarsimanersorlu misissuiffigineqarsimapput.

Killifimmik nalunaarusiaq inuit pisinnaatitaaffii qanoq pitsanngorsarnissaat politikkikkut oqallinnermut ilaasinnaasoq, Jonas Christoffersenip neriuutigaa.

- Nalunaarusiaq Inatsisartunut tunniukkutsigut oqarlutalu, aajuna tassa inuit pisinnaatitaaffii qanoq malinneqarnersut pillugit nalunaarusiaq, taava neriuutigaarput Naalakkersuisoqatigiinni iliuuseqartoqassasoq oqaloqatigiissutigineqassallunilu, Inuit pisinnaatitaaffiini institutip pisortaa, Jonas Christoffersen taama oqarpoq.