Inuit pingasunit ikinnerunngitsut rakettinik Kyivimi Mykolajivimilu saassussinerni toqutaasut

Russit rakettiisa Kyiv pingasunngornermi ullaakkut eqqorpaat.

Inuit marlunnit ikinnerunngitsut Kyivimi saassussinermi toqutaasimasut, Ukrainep præsidentia oqarpoq.

Inuk ataaseq Ukrainep kujasissortaani illoqarfimmi Mykolajivimi saassussinermi aamma toqutaasimasoq, Ukrainep præsidentiata ilanngullugu oqaatigigaa nutaarsiassaqartitsivik AFP allappoq.

Kyivip ilaa rakettinik eqqorneqarnermi kingorna innaallagiaaruttoortoq, Ukrainemi nukissiorfiit namminersortut annersaat DTEK ilisimatitsivoq.

Kyivimi ullaakkut nalunaaqutaq arfineq-marluk missaanni arlaleriarluni qaartoqarpallattoq, nutaarsiassaqartitsivik Reuters allappoq.

Ukrainep kangimut avannarpasissortaani nunap immikkoortua Kharkiv aamma saassunneqartoq, Kharkivip guvernøria Oleh Synjehubov oqarpoq.

Synjehubovip oqarnera naapertorlugu illut Kharkivip illoqarfittaani inuerunnikut arlallit rakettinit eqqorneqarput. Kharkivimi ajoqusertoqarsimaneranik nalunaaruteqartoqanngilaq.

Saassussisoqarneranik kalerrisaarutit Ukraine tamakkerlugu ullaakkut nalunaaqutaq arfernup missaani tusarsaapput. Ukraine silaannakkut akunnialunni saassunneqarpoq.

Nutaarsiassaqartitsivik Reuters Ukrainemut saassussinerit pillugit Ukrainep illersornissaqarfianut saaffiginnissimagaluarpoq, akissuteqarfigineqarsimananili.

Ukrainep kangimut avannarpasissortaa Kharkiv marlunngornermi aamma saassunneqarpoq.

Tamaani naalungiarsuk qaammatinik marlunnik utoqqaassusilik toqutaavoq, illoqarfimmi Zolotsjivimi akunnittarfik saassussinermi tassani eqqorneqarluni. Anaanaasoq inuillu allat marluk aqqunartiterput.

Illut 30-t missaat saassussinermi aseruatiterput.

Illoqarfik Zolotsjiv Ruslandimut killeqarfimmit 20 kilometeritut ungasissusilimmiippoq.