Ukraine: Rusland timmisartuaqqat ungasianiit aquttakkat 35-t atorlugit saassussivoq

Ruslandip timmisartuaqqat ungasianiit aquttakkat 35-t qaartartullu igeriuttakkat marluk atorlugit Ukrainemi sorsuffiup nalaani Ukrainemilu sumiiffinni allani saassussipput.

Ukrainep illersornissaqarfia nalunaaruteqartarfikkut Telegramikkut marlunngornermi ullaakkut taama allappoq.

Timmisartuaqqat ungasianiit aquttakkat 35-t akornanni 15-it Ukrainep illersornissaqarfianit aserorneqarsinnaasimasut aamma nalunaarutigineqarpoq. Timmisartuaqqat ungasianiit aquttakkat sinneri qanoq pisimanersut suli ilisimaneqanngitsoq, nutaarsiassaqartitsivik Reuters allapppoq. Qaartartut igeriuttakkat marluk qanoq pisimanersut aamma nalunaarutigineqanngilaq.

Aseruatitertoqarsimanersoq inunnilluunniit ajoqusertoqarsimanersoq aamma ilisimatitsissutigineqanngilaq.

Ukrainemi nukissiorfiit illersornissaqarfiullu atortui saassussinermi eqqorniarneqarsimasut, Ukrainep oqaatigaa.

Ukrainep nalunaarutaa Ruslandimit oqaaseqarfigineqanngilaq, soorluttaaq paasissutissat arlaannaannulluunniit attuumassuteqanngitsunit uppernarsarneqarsinnaasimanngitsut.

Ruslandip saassussinneqarsimanini marlunngornermi aamma nalunaarutigaa.

Timmisartuaqqat 21-t Ukrainemit Krimip qeqertaasaata tungaanut sumiiffinnullu allanut igeriunneqarsimasut Ruslandimit aserorsinnaasimasut, Ruslandimi nutaarsiassaqartitsiviit marlunngornermi ullaakkut allapput. Ruslandip illersornissaqarfia taama paasissutissiisoq ilaatigut allaaserineqarpoq.

Timmisartuaqqat ungasianiit aquttakkat Ukrainemiunut igeriunneqartut, Ruslandip illersornissamut ministereqarfiata oqaatigaa.