Inuit attaveqatigiittarfiinik atuininni pisinnaatitaaffiit ilisimalikkit
![](/sites/default/files/styles/image_934x467/public/2023-10/IPS%20Videokampgne%20PM%20billede.jpg?itok=-eIdzrTt)
Inuit pisinnaatitaaffii pillugit videoliat sakkoralugit - ”Illit inuunerit – illit pisinnaatitaaffitit” qulequtaralugu paasisitsiniaaneq Inuit pisinnaatitaaffiit pillugit Siunnersuisoqatigiit saqqummiuppaat.
Videoliat, assigiinngitsunik oqaluttuartunik imallit inuit attaveqaqatigiittarfiisigut, Facebook aamma Instagram aqqutigalugit siammarterneqassapput.
Inuit pisinnaatitaaffii pillugit Siunnersuisoqatigiit tusagassiorfinnut taama saqqummiipput.
- Videoliatigut inuit oqaluttuaat inuunerminnillu oqaluttuassaat aqqutigalugit innuttaasut inuit pisinnaatitaaffiinut tunngasutigut ilisimaqarnerulernissaat siunertarineqartoq siunnersuisoqatigiinni AC-fuldmægtigi Natuk Rosing Fleischer oqarpoq.
Inuit pisinnaatitaaffii pillugit ilisimasat 24-niit 29-nut ukiulinni appasinnerpaapput. Kalaallit inuiaat inuit pisinnaatitaaffiinut tusagassiutinillu atueriaasiinut tunngatillugu siunnersuisoqatigiit 2021-mi misissuisimanerat naapertorlugu taamaallaat taakkunani 26%- it ilisimasaqalaarlutilluunniit ilisimasaqarluartuupput.
Inuit attaveqaqatigiittarfii sammineqarnerulersut
Inuusuttut amerlanerit inuit attaveqaqatigiittarfiinik atuisuunerat taakkunuuna paasisitsiniaasoqassaaq.
- Inuit pisinnaatitaaffii pillugit ilisimatitsinerni nunatsinni illoqarfinni nunaqarfinnilu annerni minnernilu innuttaasut tamarmik ilisimasaqalernerunissaat anguniarneqarpoq. Suliatsinni nunatsinni innuttaasut tamakkerlutik pisinnaatitaaffinnut eqqummaarinninnerulernissaat atuinissaallu tunaartarivarput, Natuk nangillluini oqarpoq.
Læs også Råd for menneskerettigheder: Danmark har krænket grønlændernes menneskerettigheder
Videoliani ilaatigut inunnik assigiinngisitsinernik, isumapiloqarneq tunngavigalugu tatiginnilersitsiniaanernik (grooming) angerlarsimaffeqanngitsuunernillu oqaluttuartut takusinnaavasi.
Tamakkua saniatigut avatangiisit pillugit aammalu meeqqat inuusuttullu atugarissaarnissaannik kiisalu kulturitta illersorneqarnissaannik sulissuteqartut, suliniutillu tamakkua aqqutigalugit inuit pisinnaatitaaffiisa qanoq siuarsarneqarnissaannut tunngasut takusinnaavasi.
Paasisitsiniaaneq manna Nordatlantpuljemit aningaasalerneqarsimavoq, Danmarkimilu Inuit Pisinnaatitaaffiinut Institutti suleqatigalugu suliarineqarsimalluni. Paasisitsiniaanermi videoliat aqqanillit Nuummi, Sisimiuni aamma Sarfannguani immiunneqarsimasut takusinnaavasi.