Inuit Ataqatigiit Inatsisartunut qinersinermi ajugaasut
Inuit Ataqatigiit Inatsisartunut qinersinermi ajugaapput.
Sumiiffiilli ilaanni inernerit qinersinermi ataatsimiititaliamit akuerineqarnissaat suli amigaataapput.
Inuit Ataqatigiinnut taasisut katillutik 9.912-iupput. Taakku kingullermik Inatsisartunut 2018-imi qinersisoqarneranut sanilliullugit 2.434-nit amerlanerupput.
Siumut ajorsaraluarluni aamma siuarialaarpoq.
Siumut 7.971-init taaguunneqarpoq. Taakku 2018-imi qinersinermut sanilliullugit 14-inik amerlanerupput.
Naleraq taaguunneqarnerpaat pingajuulluni 3.249-nit taaguunneqarpoq. Taakku 2018-imi qinersinermit 682-inik ikinnerupput.
Partiit siulittaasui KNR TV-mi oqallinnermi maanna naapipput, Siumullu siulittaasuata, Erik Jensenip Inuit Ataqatigiinnit Múte B. Egede ajugaaneranik pilluaqquaa.
- Inuit Ataqatigiit qinersinermik pilluaqquarput. Ulluni tulliuttuni isumaqatigiinninniarnissat maanna qilanaaraagut, Erik Erik Múte B. Egedemut maanna nunatsinni partiini annerpaami IA-mi siulittaasuamut oqarpoq.
- Siumut ingerlanerliulinngilaq, procentpointinik marlunnik siuariarpugut.
Taavami sooq aqutsineq IA-mut tunniuttariaqarpisiuk?
- Pissutigalugu partiinut allanut taaguussisartut IA-mut taaguussipput, taamaalilluta qaangerneqarluta, Erik Jensen oqarpoq.
Namminersornerullutik Oqartussat 1979-imi atuutilerneranit aatsaat aappassaaneertumik Siumut Naalakkersuisuni siuttuussanngilaq.
2009-mit 2013-imut Inuit Ataqatigiinnit Kuupik Kleist Naalakkersuisunut siulittaasuuvoq.
IA nunatta kujataani taaguunneqartoq
Qinersinerup aallartinnginnerani isumasiuineq Inuit Ataqatigiit qinigaalluarnissaannikm takutitsivoq.
Tamanna aamma kommunimut inatsisartunullu qinersinermi eqquuppoq.
Inuit Ataqatigiit kommunimut qinersinermi Kommune Kujallermi Siumumut taasisarut pissarsiarai.
Kuannersuarni aatsitassarsiornissamik suliniut, tassa Greenland Mineralsip aatsitassanik qaqutigoortunik uranimik ilaqartumik piiaaniarnera tusarniaassutigineqarpoq. HS-Analysemit apersuisoqarnerani aperineqartunit 706-init 71 procentit suliniummut akerliupput.
Inuit Ataqatigiit aatsitassarsiornermik suliniut uranimik piiaanissamik ilaqarnera pissutigalugu unitsikkusuppaat.
Stine Egede Inuit Ataqatigiinneersoq Kommune Kujallermi Siumumit Kiista P. Isaksen taarserlugu borgmesterinngussaaq.
Kommuneqarfik Sermersuumi IA-mit Charlotte Ludvigsenip borgmesteritut atuuffigisani aamma atuuffigiinnaqqissinnaavaa, taanna 1.500-t missaannik taaguunneqarpoq.
Kommune Qeqertalimmi IA aamma siuttuuginnarpoq.
Inatsisartunut qinersinermi Nuummit taasinerit kisinneqarneranni IA siuariangaatsiarpoq. Partii tassani 3.848-nit taaguunneqarpoq. Aamma illoqarfiit annersaata tulliani Sisimiuni IA 875-init taaguunneqarluni siuttuuvoq.